Qyzylordalyq sportshy Almatyǵa velosıpedpen jolǵa shyqty
QYZYLORDA. KAZINFORM — 29 jastaǵy qyzylordalyq áýesqoı sportshy Aqdáýlet Abat Jalaǵash aýdanynan Almaty qalasyna velosıpedpen jolǵa shyqty.
Kazinform tilshisimen suhbatta ol 1200 shaqyrymǵa jýyq qashyqtyqty eńserip, osy sapary arqyly sportty nasıhattaýdy jáne onkologııalyq dertpen kúresip jatqan balalarǵa qoldaý kórsetýdi maqsat etip otyrǵanyn jetkizdi.
— Bul sapardyń maqsaty tek uzaq qashyqtyqty velosıpedpen baǵyndyrý emes. Sonymen qatar jol boıynda eldiń tarıhy men mádenıetin tanyp, kórgen-bilgenimdi áleýmettik jeli arqyly kópshilikpen bólispekpin. Eń basty maqsatym — qaterli isikpen kúresip jatqan balalarǵa rýhanı demeý bolý. Ár shaqyrym densaýlyqty tańdaýǵa, mádenıetimizdi baǵalaýǵa jáne basyna qıyndyq túsken jandarǵa «sen jalǵyz emessiń» deýge arnalǵan, — dedi Aqdáýlet Abat.
Uzaq qashyqtyqty velosıpedpen júrip ótý fızıkalyq tózimdilikti ǵana emes, myqty daıyndyq pen tabandylyqty talap etedi. Keıipkerimiz soǵan qaramastan saparyn sońyna deıin jetkizýge nıetti.
— Keıde adamǵa úlken ózgeris jasaý úshin kóp nárse qajet emes. Bir qadam, bir áreket, bir jaqsy sózdiń ózi mańyzdy. Meniń osy saparym balalarǵa, olardyń ata-analaryna jáne jalpy adamdarǵa jiger berse eken deımin, — dedi ol.
Eske salaıyq, keıipkerimiz 2 aı buryn ǵana 85 shaqyrym joldy júgirip ótip, alǵashqy belesin baǵyndyrdy. Jelaıaq jigit jedel járdem salasynda eńbek etedi. Jalaǵash aýdanynan oblys ortalyǵyna 10 saǵat 12 mınýtta jetip, maqsatyn oryndady.
