Qyzylordalyq polıtseı karateden álem chempıony atandy
QYZYLORDA. KAZINFORM – Qyzylorda oblystyq polıtsııa departamentiniń jyldam qımyldaıtyn arnaıy jasaq ınspektory, polıtsııa aǵa leıtenanty Kemelbek Qablanbek Egıpet astanasy Kaırde karateden eresekter arasynda ótken Álem chempıonatynyń jeńimpazy atandy.
Dúnıejúzilik sport dodasyna 50-den astam memleketten ókilder qatysty. Qyzylordalyq tártip saqshysy Armenııa, Reseı, Egıpet sportshylarymen synǵa tústi.
— Olardyń eshqaısysy osal emes. Degenmen, qazaq karateshileri Azııa aýmaǵynda kóshbasshy desek, qatelespeımiz. Halyqaralyq arenaǵa shyǵý eshkimge ońaıǵa soqpaǵan, qarsylastar óte myqty, tyńǵylyqty daıyndyqpen kelgen. Jarysta Egıpet memleketiniń áskerı qyzmetkerleri de óner kórsetti. Sonda da babym men baǵym qatar shaýyp, chempıon atandym, — dedi Kemelbek Qablanbek.
Keıipkerimizdiń jasy — nebári 24-te, sporttyń bul túrimen 2009 jyldan beri aınalysyp keledi. Jasóspirimder arasyndaǵy el chempıony, Azııa, Álem chempıonattarynyń júldegeri bolǵan.
— 2013 jyly Japonııa astanasy Tokıoda ótken Álem chempıonatyna qatystym. Bul — halyqaralyq arenadaǵy ekinshi jarysym. Jarysqa úlken daıyndyqpen bardym, jattyǵý barysynda túrli jaraqat aldym. Ákem de erip bardy, ol kisi qatysqan jarystarymnan qalmaıdy. Onda jeti ret jekpe-jek ótkizip, jartylaı fınalda reseılikti jeńip, fınalda japon karateshisine ese jiberdim, — dedi Kemelbek Qablanbek.
Sol synda nebári 12 jastaǵy jerlesimiz Álem chempıonatynyń kúmis júldegeri atanyp, jeńisti joly bastaldy. Bul jetistigin tipti halyqaralyq baspasóz jarysa jazdy. Al odan buryn, 2012 jyly Gongkongtaǵy Azııa chempıonatynda ekinshi oryn alǵan bolatyn.
Keıipkerimiz — halyqaralyq dárejedegi sport sheberi. 9 dúrkin el chempıony, 2 dúrkin Azııa chempıony, 4 dúrkin Álem chempıony. Birneshe jyl karateden ulttyq qurama qatarynda boldy. 2022 jyly ishki ister organdaryna jumysqa ornalasty. Keıipkerimizdiń endigi armany — eki jylda bir ret ótetin Dúnıejúzilik polıtseıler jáne órt sóndirýshiler oıyndaryna qatysyp, jeńis tuǵyrynan kóriný.
Al jýyrda Marokko astanasy Rabatta karateden Premer-lıga sanatyndaǵy jyldyń qorytyndy týrnıri máresine jetti.