Qyzylordalyq otbasy kirpishten salynǵan qarasha úıde turyp jatyr
QYZYLORDA. KAZINFORM – Kóshpendiler baspanasynyń úlgisinde salynǵan qarasha úı Qyzylorda oblysy Jalaǵash aýdanynyń ortalyǵynda ornalasqan.
Qazirgi kúni onda Dárjanovtar otbasy turyp jatyr. Kazinform tilshisimen suhbatta osy otbasynyń kenje qyzy Saltanat Dárjan úıdiń qurylysy eki jylǵa sozylyp, 2022 jyly aıaqtalǵanyn jetkizdi.
- Bul – negizi anamnyń aǵasy Asylbek Alǵashovtyń ıdeıasy. Ákem, baýyrlarym naǵashy kókemniń oıyn qýattap, aǵaıyn-týystyń kómegimen asarlatyp kirpishten sheńber tárizdes úı salýdy bastap ketti. 2020-2021 jyldary kesegi men irgetasyn quıyp qoıdy. Іshki árleý jumysyn ustalarǵa tapsyrdy. Úıdi ádemi etip salýda eshqandaı kedergi bolǵan joq, - dedi ol.
Erekshe ıdeıa ıesi Asylbek Alǵashovtyń ákesi temirden túıin túıgen, on saýsaǵynan óner tamǵan has sheberdiń ózi bolǵan. Balalyq shaǵy kıiz úıde ótken aqsaqal jyly estelikti jadynda jańǵyrtqysy kelgenge uqsaıdy. Etnostılde salynǵan baspanaǵa qazirgi kúni onyń qaryndasy Kenjegúl Espenbetova joldasy Bıbit Dárjanov jáne ul-qyzdarymen birge bas-kóz bolyp otyr.
- Zaman talabyna saı. Elektr jaryǵy, gaz, ystyq sý – barlyǵy kelip tur. Kireberis, jýynatyn bólme, ashana, jatyn bólme men qonaq bólme bar. Qabyrǵasy kesekten salynǵan. Sondyqtan jyly ári sándi bolsyn degen oımen qazaqtyń oıý-órnegi túsken kilemshe, odan bólek qaıys qamshy, ulttyq aspabymyz dombyraǵa deıin ilip qoıdyq. Atam paıdalanǵan esepshot ta, naǵashy ájemniń qoldan jasalǵan sandyǵy da úıimizde tur, - dedi aýdan turǵyny.
Eski men jańa úılesim tapqan qarasha úıdi kórýge qyzyǵýshylyq tanytatyndar az emes.
- Kóp adam habarlasyp jatady. Qazaqta til-kóz degen senim bar bolǵandyqtan biz barlyǵyna birdeı ruqsat bermeımiz. Kelip kórgen kisiler tańdanysyn jasyrmaıdy, - dedi Saltanat Dárjan.
Eske salaıyq, jýyrda Úndistannyń Nıý-Delı qalasynda ótken ıÝNESKO-nyń Úkimetaralyq komıtetiniń 20-shy sessııasynda «Kıiz úıdi jasaý jáne qoldaný dástúri» atalymyn keńeıtý týraly sheshim qabyldandy.