Qyzylordalyq ónerpaz respýblıkalyq kúıshiler konkýrsynyń jeńimpazy atandy
QYZYLORDA. KAZINFORM - Búgin Qyzylordada Ulttyq dombyra kúnine oraı Myrza Toqtabolatulynyń 175 jyldyǵyna arnalǵan «Syr tolqyny» atty II respýblıkalyq kúıshiler konkýrsy ótti. Bul týraly oblystyq mádenıet, arhıvter jáne qujattama basqarmasynan habarlady.
Myrza Toqbolatuly — jastaıynan dombyrany janyna serik etken, kúı dodasyna túsken talant ıesi. Ol 1847 jyly Qazaly ýezine qarasty (qazirgi Aral aýdanynyń aýmaǵynda) Qaraqum qoınaýyndaǵy Jylandy jerinde dúnıege kelgen. Biletinder onyń 20-dan astam kúıi bar ekenin aıtady.
Kúıshi esimin ulyqtaǵan óner dodasy Syr elinde bıyl ekinshi ret ótti. Oǵan respýblıkanyń 10 óńirinen 24 talapker qatysyp, ózara baq synady.
Baıqaýǵa kúıshi-kompozıtor, Qurmaǵazy atyndaǵy Qazaq ulttyq konservatorııasynyń professory, «Qurmet» ordeniniń ıegeri, akademık Tólepbergen Tóreahmetuly bastaǵan kúı óneriniń sheberleri qazylyq etti.
- Dodaǵa Qazaqstannyń ár óńirinde qalyptasqan kúıshilik dástúrdi taratyp, jetkizýshiler bas qosty. Baıqaý qorytyndysymen III oryn Erimbet Orynbasarov (Aral aýdany), Madııar Jasańbaev (Qarmaqshy aýdany) jáne Altynaı Mahmýtqa (Qaraǵandy qalasy) buıyrsa, Jánibek Jumabaev (Mańǵystaý oblysy) pen Aısholpan Qasymova (Astana) II oryn ıegeri atandy. Júldeli I oryndy Saıat Nurálı (Almaty oblysy) qanjyǵasyna baılasa, qyzylordalyq Mahambethan Dosymjan baıqaýdyń bas júldesin jeńip aldy. Óner alamanynda qarsylastarynan oq boıy oza shapqan Serik Asqar (Shymkent qalasy), Ábiljan Táttimbet (Jambyl oblysy), Kósherbaı Muhameddın (Qyzylorda qalasy), Jumaǵalı Serik (Almaty qalasy) jáne Kengesbaeva Juldyzaıǵa (Almaty qalasy arnaıy júldeder tabystaldy. Konkýrs Syr boıy kúılerin qaıta jańǵyrtyp, jergilikti kúıshi-kompozıtorlardyń murasyn jas jetkinshekterge nasıhattaý arqyly halqymyzdyń kóne, folklorlyq-etnografııalyq dombyra aspabyn meńgerýde kásibı sheberlikterine yqpal jasaýǵa, ónerpazdar qataryn daryndy, jańa býyn ókilderimen tolyqtyrýǵa múmkindik berdi, - delingen basqarmanyń habarlamasynda.
Sondaı-aq búgin Ulttyq dombyra kúnine oraı Almatyda «Kúmbirle, qońyr dombyra» atty kórme ashyldy.
