Qyzylordalyq oqýshylar kózi kórmeıtin jandarǵa arnap komıks qurastyrdy
QYZYLORDA. KAZINFORM — Torǵyn Erlanqyzy men Laǵyl Amangeldi Qyzylordadaǵy Nazarbaev zııatkerlik mektebiniń 11 synybynda oqıdy. Olar bul ıdeıasyn geografııa pániniń muǵalimi Araı Nurbaevanyń jetekshiligimen júzege asyrǵan.
Elimizde múmkindigi shekteýli jandarǵa arnalǵan braıl qarpinde jazylǵan kitaptar bar.
Oqýshylar Kazinform tilshisine biraq komıksti taktıldi formatqa beıimdeý áli keń tarala qoımaǵanyn jetkizdi.
— Biz sheteldik ınklıýzıvti basylymdardyń tájirıbesin qarastyrdyq. sondaı-aq braıl júıesiniń halyqaralyq standarttaryna súıendik. Joba barysynda jergilikti arnaıy mektepterdiń muǵalimderinen keńes aldyq. Oqýshylar ǵylymı apparat jaǵynan braıldiń qurylymy, qarip ólshemi, taktıldi relef jasaý tásilderi boıynsha sarapshylardyń ádistemelik materıaldaryn qoldandy, — dedi Araı Nurbaeva.
Ideıa kórý qabileti buzylǵan balalar úshin qoljetimdi kontenttiń azdyǵyna baılanysty týyndaǵan.
— Osy máseleni sheshý úshin braıl qarpin zerttep, komıks formatyn taktıldi túrde beıimdeý jolyn izdedik. Jobany júzege asyrý barysynda mátindi yqshamdaýdy, stsenarıı qurýdy, braıl tańbasyn qoldanýdy jáne arnaıy prınter arqyly basyp shyǵarýdy úırendik, — dedi Torǵyn Erlanqyzy.
Zeıindi balalar komıkstiń artyqshylyǵyn aıtyp berdi.
— Klassıkalyq braıl kitaptarynda kóbine tek mátin beriledi. Al komıks — oqıǵany vızýaldy-kórkem qurylym arqyly meńgerýge múmkindik beretin janr. Biz osy qurylymdy taktıldi elementtermen almastyryp, kórý qabileti shekteýli oqyrmanǵa jańa qural usynýdy maqsat ettik. Komıks mátinniń qysqa bolýymen, kadrlardyń logıkalyq rettiligimen, taktıldi beıneler jasaýmen jáne olardy braıl mátinine yńǵaılaýmen erekshelenedi. Joba balalarǵa da, jasóspirimderge de arnalǵan. Óıtkeni komıks tanymdyq materıaldy jeńil qabyldaýǵa kómektesedi. Mazmunynda shaǵyn oqıǵa, keıipkerlerdiń dıalogy jáne tárbıelik ıdeıa qamtylǵan, — dedi joba avtorlarynyń biri Laǵyl Amangeldi.
Oqýshylar bul bastamany basqa da jaratylystaný pánderine beıimdep, komıks úlgisindegi oqý quraldaryn ázirleýdi josparlap otyr.
— «InComics» dep atalatyn mobıldi qosymshamyzdyń arqasynda komıks kitabymyzdy barsha oqýshy, onyń ishinde erekshe bilim berýdi qajet etetin balalar úshin qoljetimdi ete alamyz. Bul kózi kórmeıtin jáne nashar kóretin balalardyń oqý protsesin jeńildetýge, komıks túrindegi vızýaldy áńgimeler arqyly oqýǵa qyzyǵýshylyǵyn arttyrýǵa, oǵan qosa oqý barysyn baqylap, oqýshynyń jetistikterin kórýge múmkindik beredi, — dedi Araı Nurbaeva.
Bul joba jýyrda respýblıkalyq ǵylymı jobalar konkýrsynyń ІІ kezeńinde júldeli 1-oryndy ıelenip, úzdik joba retinde tanyldy.
Jaqynda ǵana biz Qyzylordada aýyl balasy uıaly telefonǵa arnalǵan qaýipsiz júıe oılap tapqanyn jazǵan edik.
