Qyzylordalyq oqýshylar ym-ıshara tilin aýdaratyn JI platformasyn ázirledi
QYZYLORDA. KAZINFORM — Qyzylorda qalasyndaǵy Nazarbaev Zııatkerlik mektebiniń oqýshylary Aıshabıbi Erlanqyzy men Ǵaınıjamal Berikqyzy jasandy ıntellekt negizinde jumys isteıtin QOLDAU AI veb-platformasyn ázirledi.
Joba ym-ısharany naqty ýaqyt rejıminde tanyp, ony mátin men dybystyq habarlamaǵa aınaldyrýǵa múmkindik beredi. Oqýshylar muny alǵash ret Qyzylorda qalasyndaǵy estý qabileti buzylǵan balalarǵa arnalǵan №6 arnaıy mektep-ınternatynda synaqtan ótkizdi.
- Platformany paıdalaný úshin qarapaıym veb-kamera men ınternetke qosylý jetkilikti. Júıe qazaqtyń ym tilindegi ısharalardy tanyp, olardy mátindik jáne dybystyq formatqa túrlendiredi. Bul estý qabileti buzylǵan adamdardyń aınalasyndaǵylarmen qarym-qatynas jasaýyn jeńildetýge baǵyttalǵan. Platformany paıdalanýshylar qosymsha baǵdarlamalar ornatyp áýre bolmaıdy, - dedi joba avtorlary.
Synaq barysynda mektep-ınternat tárbıelenýshileri platformany qoldanyp kórip, áserin bólisti. Pedagogter jobanyń tájirıbelik mańyzyn atap ótip, júıe tanıtyn ym-ısharalar qoryn keńeıtýdi usyndy. Olar bul tehnologııa balalardyń jazbasha sóıleý daǵdylaryn damytý úshin qosymsha qural bola alady dep esepteıdi.
– Oqýshylardyń mamandar men ata-analarǵa paıdaly kómekshi bola alatyn osyndaı platforma ázirlegeni qýantady. Ym-ıshara tilindegi keıbir qımyldardy naqtylap, jetildirý qajet. Aldaǵy ýaqytta platformada oqytý materıaldary men beınesabaqtardyń kóbirek bolǵanyn qalaımyz, – dedi ym-ıshara tiliniń mamany Zýhra Qaljanova.
QOLDAU AI jobasyn jetildirý jumysy fızıka pániniń muǵalimi Aınur Quraqbaeva men Qyzylorda qalasyndaǵy NIS dırektorynyń ǵylymı-ádistemelik jumys jónindegi orynbasary Madına Rashıtovanyń jetekshiligimen jalǵasyp jatyr. Joba avtorlary usynys-pikirlerdi eskere otyryp, platformany paıdalanýshylardyń qajettiligine qaraı jetildirýdi josparlap otyr.
Buǵan deıin almatylyq eki oqýshy banan qabyǵy arqyly qan toqtatatyn untaq jasap shyǵardy.
