Qyzylordalyq oqýshy «Jyr-dombyra» atty ınteraktıvti qural jasap shyǵardy

QYZYLORDA. KAZINFORM — Qyzylordadaǵy Nazarbaev zııatkerlik mektebiniń 12-synyp oqýshysy Syrsuńqar Bazarbaıuly qazaqtyń umytylyp bara jatqan jyr-dastandaryn áleýmettik jelide nasıhattap júr.

Қызылордалық оқушы «Жыр-домбыра» атты интерактивті құрал жасап шығарды
Фото: Кейіпкердің жеке мұрағатынан

Ol fızıka-matematıka baǵytynda bilim alsa da kóńiline jaqyn jyr ónerinen qol úzgen emes.

Mektepte shyǵarmashylyq kontsert ótkizip te úlgerdi. TikTok platformasynda jyr, terme oryndaýshysy retinde óte tanymal. Aýdıtorııasy áldeqashan qalyptasqan. Avtorlyq týyndylarymen tyńdarmanyn qýantyp júr. 

Respýblıkalyq ǵylymı jobalar baıqaýynda ustazy Aıgúl Zeınýllanyń jetekshiligimen dástúrli jyr ónerin zamanaýı tehnologııalar kómegimen nasıhattaýdyń tıimdi joldaryn usyndy. Talantty jas baıqaýǵa ózi ázirlegen «Jyr-dombyra» atty ınteraktıvti qural men «Qazaqtyń jyr óneri» atty avtorlyq mádenı-tanymdyq saıtty usyndy. 

Sonyń arqasynda ózge oqýshylardan oza shaýyp, І oryn ıelendi. 

— Jobamnyń ereksheligi — jasandy ıntellekt jáne ınteraktıvti quraldar kómegimen dástúrli ónerdi nasıhattaý. Instagram, TikTok áleýmettik jelilerinde blog júrgizemin. Jastar qazir áleýmettik jelide jıi ýaqyt ótkizedi. Men osy múmkindikti oń jaǵyna paıdalanǵym keledi. «Jyr-dombyra» ınteraktıvti quraly dombyranyń prototıpi ispetti. Tetigin bassań, jastarǵa arnalǵan terme-jyrlar oınap qoıa beredi, — dedi Syrsuńqar Bazarbaıuly.

Ónerli óren sondaı-aq «Qobylandy batyr» jyrynyń sıýjetine sáıkes anımatsııa ázirlep, ony jyr mazmuny ózgeshe stıldegi áýende usyndy.

Al ótken jyly osy mekteptiń oqýshylary qazaq tilin úırengisi jáne tereń tanyǵysy kelgen adamdarǵa arnap «Naqyl söz» qosymshasyn oılap tapty.

Сейчас читают