Qyzylordalyq oqýshy shahmattan álem chempıonatynda qola medal aldy
QYZYLORDA. KAZINFORM - Qyzylordalyq oqýshy Aqyljan Meıirhanuly shahmattyń blıts túrinen álem chempıonatynda úshinshi oryn aldy.
Ózbekstan astanasy - Tashkent qalasynda 13 jasqa deıingi oqýshylar arasynda shahmattyń blıts túrinen álem chempıonaty ótti. Onda Aral aýdanyndaǵy J.Ábdirashuly atyndaǵy №62 mektep-lıtseıiniń 7 synyp oqýshysy Aqyljan Meıirhanuly úzdik úshtikti túıindedi.
Qyzylordalyq jas óren buǵan deıin óz qatarlastary arasynda talaı respýblıkalyq jarysta top jardy. Jaqynda Almaty qalasynda ótken jasóspirimder arasyndaǵy Azııa chempıonatynda komandalyq esepte 2 altyn medal enshilegen edi.
Aıta ketsek, Aqyljannyń jeke bapkeri - ákesi Meıirhan. Ol kisi otbasyndaǵy alty balasyn da shahmatqa baýlyǵan. Qazirge deıin balalary Saǵynysh, Saqypjamal, Meıirjan, Sabına kezinde san alýan jarystarda top jarǵan. Halyqaralyq jáne respýblıkalyq deńgeıdegi básekelerde jeńimpaz jáne júldeger atanǵan.
«Balalardy jarysqa ózim alyp baramyn. Saıys barysynda keńes berýge tyrysamyn. Árbir jeńis osyndaı ólsheýsiz eńbektiń jemisi. Uldyń kenjesi Aqyljannyń Álem chempıonatyna joldama alýy kóp jylǵy eńbektiń jemisi dep bilemin», -dedi Meıirhan Barmaǵanbetov.
