Qyzylordalyq oqýshy Qazaq handyǵy jaıly ústel oıynyn jasady
QYZYLORDA. KAZINFORM — Qyzylorda qalasyndaǵy Nazarbaev zııatkerlik mektebiniń 9-synyp oqýshysy Gaýhar Marat Qazaq handyǵy dáýirin jańasha sıpatta tanytatyn «Altyn taq» tanymdyq ústel oıynyn qurastyrdy.
Keıipkerimiz ony tarıh pániniń muǵalimi Aıgúl Zeınýllanyń jetekshiligimen daıyndaǵan.
Ustaz sabaq protsesine oqýshylardyń jas ereksheligine sáıkes oıyn elementterin qosý balanyń tarıhı oılaý daǵdysyn damytady dep esepteıdi.
— Bul oıyndy bizdiń mektepte 7-synypta, al ózge mektepterde 6-synypta qoldanýǵa bolady. Qazirgi kúni balalar sandyq málimetti jattaýǵa qınalady. Tarıhı oqıǵalarǵa, tulǵalarǵa qatysty derekterdi shatastyrady. Al sabaqty tanymdyq oıynǵa ushtastyrý osy olqylyqtyń ornyn toltyrýǵa, ıaǵnı este saqtaý qabiletin arttyrýǵa kómektesedi. Bul oıyndy qazaq handyǵy taqyrybyn ótken kezde qoldandyq. Álde de dızaınyn ózgertip, handardy ǵana emes, batyrlar, jyraýlar, Alash qaıratkerleri men taǵy basqalardy qamtyp, basqa mektepterge taratý oıda bar, — dedi Aıgúl Zeınýlla.
Joba avtory tarıhı tulǵalardyń rólin baǵalaý arqyly oqýshylardyń tanymdyq qyzyǵýshylyǵyn arttyrýǵa bolatynyna senimdi.
— Oıynda eki taqta bolady, árqaısysynda 24 kartochka bar. Bir jaq betinde hannyń sýreti, ekinshi betinde ol týraly aqparat jazylǵan. Komandalar kezekpen qupııa handy tańdaıdy. Ony qarsylas komandaǵa jasyryp, eki aqparat usynady, ıaǵnı jasyrǵan handy tabýǵa eki múmkindik beriledi. Oıyn búkil hannyń kim ekeni tabylǵansha jalǵasady, — dedi Gaýhar Marat.
Gaýhardyń jumysy NIS Ustaz Qazaqstan tarıhy jáne quqyq negizderi qaýymdastyǵynyń Olımpıada jáne konkýrstar komıteti Qazaq handyǵynyń 560 jyldyǵyna arnap uıymdastyrǵan «Tarıhı taǵylym» respýblıkalyq jelilik baıqaýynda І orynǵa ıe bolǵan.
Eske salsaq, buǵan deıin osy mekteptiń taǵy bir oqýshysy Syrsuńqar Bazarbaıuly «Jyr-dombyra» atty ınteraktıvti qural jasap shyǵarǵan edi.