Qyzylordalyq oqýshy qaýipsiz lıft jobasyn oılap tapty
QYZYLORDA. KAZINFORM – Qyzylorda oblysy Jańaqorǵan aýdanyndaǵy №286 orta mekteptiń 6-synyp oqýshysy Nurseri Aıtjan adam ómiri úshin qaýipsiz lıft jobasyn oılap tapty.

Statıstıkaǵa súıensek, Qazaqstandaǵy árbir tórtinshi lıft qaýipti. Basym bóligi jóndeýdi nemese tolyq aýystyrýdy qajet etedi. Jalpy lıfttiń qaýipsizdigine eshkim kepildik bere almaıdy.
Talapty jastyń jobasynda qaýipsizdik máselesine aıryqsha kóńil bólingen.
- Qazirgi lıft trostary óte álsiz, úzilip ketse, adamdy aman alyp qalý múmkin emes. Sondyqtan oǵan avtokóliktegi sııaqty qaýipsizdik jastyǵyn ornatýdy jón kórdim. Qandaı da bir aqaý shyqqan jaǵdaıda jastyq ashylyp, adam ómirin saqtap qalýǵa kómektesedi, - dedi Nurseri Aıtjan.
Oqýshy kórkem eńbek pániniń muǵalimderi Órken Aqbaev, Qudabaı Tastanbekov, Erlan Raıymbek jáne robototehnıka muǵalimi Aıdos Arasattyń kómegimen sý dıirmeni, sýústi kópiri sııaqty ózge de erekshe jobalar jasap shyǵardy.
Buǵan deıin biz qyzylordalyq jas ónertapqysh órttiń aldyn alatyn aqparattyq júıe jasaǵanyn habarlaǵanbyz.