Qyzylordalyq oqýshy ınsýlt alǵan patsıentterdi ońaltýǵa arnalǵan keshen qurastyrdy
QYZYLORDA. KAZINFORM – Qyzylorda qalasyndaǵy Nazarbaev zııatkerlik mektebiniń 12-synyp oqýshysy Erasyl Aıdarbek NauanX komandasynyń quramynda Stambul qalasynda ótken Empower Me halyqaralyq baıqaýynda ІІ oryn ıelendi.
Ol mektep túlekteri Juldyzaı Muńaıtbasova, Araılym Áshirmet jáne Raýshan Turǵanbaımen birge ınsýlt alǵan patsıentterdi ońaltýǵa arnalǵan keshendi tanystyrdy.
Joba avtoryna bul ıdeıa jaqyn tanysy ınsýlt alǵan kezde kelgen.
- Baqytymyzǵa oraı ol aman qaldy. Biraq ońaltý kezeńi aýyr ótti. Jattyǵýlar óte bir saryndy boldy. Dárigerler naýqasqa AQSh-tan robottandyrylǵan ońaltý trenajerin satyp alýdy usynǵan. Ózi qarapaıym mehanıkalyq qolǵap bolsa da quny 1700 dollar eken. Tym qymbat ekeni túsinikti. Sol kezde munyń tıimdi sheshimi bolýy kerek qoı degen oı keldi. Birneshe aıdyń ishinde biz keshenniń alǵashqy jumys isteıtin prototıpin ázirledik, - dedi Erasyl Aıdarbek.
Keshen beıneoıyndarmen biriktirilgen úsh arnaıy qurylǵydan turady jáne árqaısysyna tán mindetter bar. Remotion usaq motorıka men qol qımyldarynyń dáldigin damytsa, R-Expander arqyly patsıent oıyn nysandaryna atý úshin tutqany qysyp, bilektiń kólbeýin basqara otyryp, bilek bulshyqetin jattyqtyrady. Resound mýzykalyq trenajer retinde jumys isteıdi. Bas barmaqtan basqa saýsaqtar belgili bir notaǵa jaýap beredi. Patsıent qarapaıym notalyq partıtýrany oqyp, áýenderdi oınaı otyryp, saýsaqtardyń oqshaýlanǵan qımylyn, úılesimdilik pen kognıtıvtik fýnktsııalardy damytady.
- Álemdik statıstıka boıynsha 94 mıllıonnan astam adam ınsýlttiń zardabyn tartyp otyr. Ońaltý kezeńinde patsıentterdiń kóbi kúndelikti qaıtalanatyn, birizdi fızıkalyq júktemelerge baılanysty nemquraılylyq pen depressııaǵa tap bolady. Biz osy aýyr kezeńdi oıyn protsesine aınaldyryp, qamkóńil jandardyń kóńilin aýlaýdy uıǵardyq. Patsıentter tobyn 8 apta boıy synaqtan ótkizdik. Elektromıografııa (EMG/RMS) derekteri bulshyqet belsendiliginiń artqanyn kórsetti. Patsıentter oıyn formatyndaǵy jattyǵýǵa qulshynyspen qatysyp, kóńil-kúıi kóterilgenin atap ótti, - dedi ónertapqysh oqýshy.
Erasyl Aıdarbek $5000 kólemindegi baıqaý júldesin qaıda jumsaıtynyn da josparlap qoıǵan.
- Grant esebinen qurylǵynyń alǵashqy nusqasyn medıtsına mamandarynyń keńesi men baqylaýy aıasynda damytyp, naqty emdeý talaptaryna laıyqtaǵymyz keledi. Patent pen avtorlyq quqyqty rásimdep qoıdyq. Qymbat medıtsınalyq lıtsenzııalaý rásiminen ótý úshin qajet qujattardy daıyndaýǵa kiristik. Bizdiń basty maqsatymyz – barshaǵa qoljetimdi tolyqqandy kommertsııalyq ónim shyǵarý. Bul elimizde ǵana emes, shet eldegi ońaltý ortalyqtary, memlekettik jáne jekemenshik klınıkalardyń standartty jabdyqtarynyń bir bóligine aınalyp, myńdaǵan adamnyń tolyqqandy ómirge qaıta oralýyna kómektesse maqsatymyzdyń oryndalǵany, - dedi joba avtory.
Buǵan deıin habarlaǵanymyzdaı, qazaqstandyq jas ónertapqysh Dana Qadyrbek Birikken Ulttar Uıymynyń Venadaǵy shtab-páterinde ótken jasyl tehnologııalar kórmesinde Qazaqstan atynan qatysyp, júldeger atandy.
