Qyzylordalyq oqýshy egistiktegi sý shyǵynyn azaıtatyn qondyrǵy qurastyrdy
QYZYLORDA. KAZINFORM – Qyzylorda qalasyndaǵy Nazarbaev zııatkerlik mektebiniń 10-synyp oqýshysy Aızere Jaqypbek sý tapshylyǵy kúrdelengen ýaqytta egis alqabyndaǵy ırrıgatsııalyq júıeni jetildirýdiń jolyn tapty.
Ol bul máseleni avtomattandyrylǵan sýarý júıesin qoldaný arqyly sheshýge bolatynyn dáleldedi.
- Joba barysynda ustazymyzdyń jetekshiligimen egistikti tıimdi sýarýǵa arnalǵan Arduino protsessoryna negizdelgen qondyrǵy qurastyrdym. Qondyrǵy topyraq ylǵaldylyǵy, aýa temperatýrasy jáne jaryq mólsheri týraly aqparatty arnaıy datchık arqyly qabyldap, alynǵan derekke súıene otyryp sýdy únemdi jumsaýdy qamtamasyz etedi. Mundaı júıe sý shyǵynyn 25-30 paıyzǵa deıin azaıtyp, artyq sýarý saldarynan týyndaıtyn topyraq erozııasy men qunarsyzdanýynyń aldyn alady, - dedi Aızere Jaqypbek.
Joba avtory sý resýrsy osy zamandaǵy eń basty qundylyq ekenin, álemdik klımattyń ózgerýi men halyq sanynyń ósýi saldarynan oǵan suranys artqanyn atap ótti.
- Qazaqstan jaǵdaıynda bul másele aıryqsha seziledi. Sebebi elimizdiń kóp bóligi arıdti, shóldi jáne shóleıt klımat aımaǵynda ornalasqan. Sońǵy jyldary egis alqabynda sý jetispeýshiligi anyq sezile bastady. Al bul aýyl sharýashylyǵyna tikeleı keri áserin tıgizedi. Osyǵan baılanysty ırrıgatsııalyq júıelerdi jetildirý – elimiz úshin strategııalyq mańyzy bar baǵyt, - dedi oqýshy.
Avtomattandyrylǵan júıeniń dástúrli ádiske qaraǵanda tıimdi ekeni tájirıbe barysynda dáleldengen. Ósimdikter qolaıly ýaqytta sýarylyp, tamyr júıesiniń aýrýy azaıǵan. Bul bir jaǵynan fermer eńbegin jeńildetip, ónimdilikti arttyrýǵa sep.
- Irrıgatsııalyq júıeni jetildirý – tek agrotehnıkalyq jańalyq qana emes, ol — elimizdiń ekonomıkalyq turaqtylyǵyn, ekologııalyq qaýipsizdigin jáne áleýmettik damýyn qamtamasyz etetin tıimdi sheshim. Avtomattandyrylǵan sýarý tehnologııasy – Qazaqstandaǵy aýyl sharýashylyǵy úshin bolashaqtyń kilti, - dedi joba avtory.
Buryn habarlaǵanymyzdaı, Astana qalasyndaǵy Sheıh Halıfa ben Zaıd ál-Nahaıan atyndaǵy №84 mektep-lıtseıiniń 9 «A» synyp oqýshysy Aldııar Bekjan «Tsıfrly mektep» jobasyn iske asyrdy.
