Qyzylordalyq oqýshy baǵdarlamalaýdy oıyn arqyly úıretetin mobıldi qosymsha oılap tapty
QYZYLORDA. KAZINFORM – Qyzylorda qalasyndaǵy Nazarbaev zııatkerlik mektebiniń 7-synyp oqýshysy Danıal Shakızada baǵdarlamalaý boıynsha bazalyq daǵdy qalyptastyrýǵa múmkindik beretin CodeQuest mobıldi oqytý qosymshasyn oılap tapty.
Danıal muny jetekshileri Razııa Baımurzaeva, Gúlfaırýz Bazarbaevamen birge júzege asyrdy. Ol qosymshaǵa oqý materıaldaryn, praktıkalyq tapsyrmalar, testter, kvest kartasy men shaǵyn oıyndar engizgen.
- CodeQuest – mektep oqýshylaryna baǵdarlamalaýdy úıretýge arnalǵan mobıldi qosymsha. Onyń kómegimen sabaqty oıyn túrinde uıymdastyrýǵa bolady. Oqýshy taqyrypty tańdap, aldymen qysqasha teorııamen tanysady. Sodan keıin tapsyrmalar men testterdi oryndaıdy. Ár taqyryp birneshe deńgeıden turady. Deńgeı joǵarylaǵan saıyn tapsyrma da kúrdelene túsedi. Sondyqtan oqýshy materıaldy jeńilden qıynǵa qaraı meńgeredi. Qosymshada kvest elementteri bar. Árbir oryndalǵan tapsyrma úshin oqýshy robottyń bir bóligin jınaıdy. Barlyq deńgeı aıaqtalǵan soń keıipker tolyq ashylady. Bul oqýshynyń qyzyǵýshylyǵyn arttyryp, oqýǵa yntasyn kúsheıtedi, - dedi Danıal Shakızada.
Jas tehnokrattyń jobasyn birinshi bolyp synyptastary tájirıbeden ótkizgen.
Olardyń aıtýynsha, qosymshanyń ınterfeısi qarapaıym jáne túsinikti. Barlyq batyrma anyq kórinedi, túsi de tartymdy.
– Negizgi bette oqýshy óziniń deńgeıin, tapsyrmalardy jáne progresin kóre alady. Interfeıs balalarǵa yńǵaıly bolý úshin artyq aqparat salmadyq. Ár tapsyrma bólek bette kórsetiledi. Bul tapsyrmaǵa oqýshynyń nazaryn tolyq aýdarýǵa kómektesedi. Qosymshany paıdalaný úshin arnaıy daıyndyq qajet emes. Kez kelgen oqýshy ońaı túsinip, qoldana alady, - dedi keıipkerimiz.
Ozyq oıly oqýshy ınnovatsııalyq qosymshasyn jýyrda «Zerde» respýblıkalyq zertteý jobalary men shyǵarmashylyq jumystary baıqaýynyń ınformatıka, robototehnıka jáne STEM-ınjenerııa sektsııasynda tanystyryp, І orynǵa ıe boldy.
Jaqynda biz Qorqyt ata atyndaǵy Qyzylorda ýnıversıtetiniń qos stýdenti qaýipti saıttar men siltemelerdi anyqtaıtyn baǵdarlama ázirlegenin jazǵan edik.