Qyzylordalyq «morj» muzdaı sýǵa túserde qorqynyshyn qalaı jeńgenin aıtyp berdi
QYZYLORDA. KAZINFORM — Qyzylorda oblysy Qarmaqshy aýdanynyń turǵyny Ásem Merekova muzdaı sýǵa túsýdi, tipti qystyń qaqaǵan aıazynda qarǵa shomylýdy ádetke aınaldyrǵan. «Morj» kelinshek boı sergitetin ádetti bastarda qorqynyshyn qalaı jeńgenin aıtyp berdi.
Keıipkerimizge bul oıdyń kelgenine kóp jyl bolǵan. Alaıda, qorqaqtap júripti. Byltyr jeltoqsanda ǵana oıyn júzege asyrýdyń sáti tústi.
— Shamamdy kórmek bolyp, áýeli «bismillámdi» aıtyp, bólme temperatýrasynda turǵan sýdy ústime quıdym. Óıtkeni birden muzdaı sýdan bastasam, denem titirkenip, shok alýym múmkin edi. Biraq, baıqaımyn, burynǵydaı qorqynysh joq. Tórt kún solaı qaıtalap, odan keıin qar men salqyn sýǵa shomylýǵa boıymdy úırettim. Sodan beri ómirge qulshynysym artty, ózimdi sergek sezinetin boldym, — deıdi Ásem Merekova.
Ol Qyzylordanyń ózine tán yzǵarly jeli, qary men aıazy esh kedergi emes ekenin aıtty. Barlyq qorqynysh tek mıymyzda dep esepteıdi. Keıipkerimiz muzdaı sýǵa túskennen keıin jyly tósegine jata qalmaı, jattyǵý jasap, dalada serýendep keledi.
Tabıǵat aıasynda tańmen talasa júgirýdi bastaǵanynyń ózine jeti-segiz jyldyń júzi bolǵan. Kútpegen qıyndyqtar ómirin osylaı kúrt ózgertken.
— Aýrýdyń kóbi depressııadan. Men de bul joldan óttim. Kóp jyl ózimmen kúrestim, jeńilip qalǵan kezderim de boldy. 2017 jyldan bastap tabıǵatqa shyǵý, tańerteń jaıaý júrý, durys tamaqtaný sııaqty ádetterdi serik ettim. Amerıkalyq jazýshy Djozef Merfıdiń kitabynan oqyǵan «men álemnen ne alamyn dep emes, álemge ne bere alamyn dep ómir súr» degen sózi meni qanattandyrdy. Buryn syrtqy kelbetim ózime unamaıtyn. Onyń ústine, tabanym men qolym jylymaıtyn. Salaýatty ómir saltyn ustanǵannyń arqasynda ózime kóńil tolmaýshylyqtan, ústi-ústine jamap alǵan aýrýlardan aryldym. Kóp jyldan beri osy ádetterim týraly áleýmettik jelilerde úzbeı jarııalap júrmin. Muny kórip, qaıtalaǵan adamdardan oń pikirler estıtin boldym. Jurtqa paıdań tııý de qýanyshqa bóleıdi eken, — deıdi keıipkerimiz.
Ásem Merekova Túrkistan, Shymkent, Baıqońyrda qalalaryndaǵy júgirý marafondaryna qatysqan.
— Oǵan múmkindigi shekteýli adamdardyń, ata-ájelerdiń qatysqanyn kórip, ózimdi qamshylaı tústim. Sáýirde Almatydaǵy marafonǵa qatyspaqpyn. Aınalamdaǵy adamdar kezinde meni túsingen joq. Eki qyzyna qarap, tynysh otyrmaı ma eken dep synaǵandar boldy. Biraq men eshkimniń sózin elemedim. Qazirgi kúni balalarym ósti. Áleýmettik jelige salatyn búkil vıdeony úlkenim túsiredi. Ekeýi de qasymda júrip shynyǵady. Biz nan, tátti, fast-fýd, gazdy sýsyn ataýlydan bas tartqanbyz, — deıdi qyzylordalyq «morj».
Osyǵan deıin Qyzylorda oblysynda qaıtys bolǵan balany taekvondo sektsııasyna tirkegeni belgili boldy.