Qyzylordalyq «magnıt adamdar» erekshe qasıeti týraly aıtyp berdi
QYZYLORDA. KAZINFORM — Boıyna kisi tańǵalarlyq qasıet daryǵan adamdar bolady. Denesine kez kelgen temir-tersek ońaı jabysa ketetin sondaı jandarmen Kazinform tilshisi tildesti.
Qyzylorda qalasynyń turǵyny Nartaı Tursanovty jurt «magnıt adam» atap ketken. Ol keýdesimen 165 kelilik temirdi kótere alady. Keıipkerimizdiń negizgi mamandyǵy — zootehnık. Biraq mamandyǵy boıynsha jumys istep kórmepti.
— Alys jolǵa qatynaıtyn kólik aıdadym. Aýyr jumys isteý arqyly energııamdy shyǵaratynmyn. «KrAZ», «Ýral» sııaqtylardyń dóńgelegin bortqa jalǵyz ózim laqtyratynmyn, — dedi ol.
Nartaı Tursanovtyń boıyndaǵy fenomendik qubylys búgin ǵana paıda bolǵan joq. Tek ózi jastyq jalynmen eleı qoımaǵan ári jarııaǵa jar salýdy jón sanamaǵan.
— 13 jasymda bir aıaǵym istemeı qalyp, qatty aýyrdym. Dárigerler dıagnozyn tapqan joq. Sodan Shıelide turatyn emshige júginip, betim beri qarady. Ol kisi boıymda erekshe qasıet baryn aıtyp, jaman ádetterden aýlaq bolýdy eskertti. Buǵan asa mán bermedim. Biraq ár múshelimde áıteýir bir qıyn jaǵdaıǵa tap bolatynmyn. Aǵanyń sóziniń astaryn keıin túsindim. Jat ádetterden bas tartyp, psıhologııa men medıtsına tásilderin úırenýge kiristim. Osylaısha emshilik qyrym baryna kózim jetti, — dedi ol.
Keıipkerimiz búginde bul qasıetin adam emdeýge qoldanyp keledi. Nartaı Tursanovtyń aldyna kelip, aýrýynan jazylǵandardyń biri — belgili ziltemirshi Nıjat Rahımov. Emshi ony kóptegen aýyr atletke ortaq protrýzııa dertinen aıyqtyrǵan. Sportshy emshiniń denesine temir-tersek te, aǵash, shyny buıymdar da jabysatynyn kórip qatty tańdanypty.
Taǵy bir keıipkerimiz Názirhan Ótepbergenov Jańaqorǵan aýdanynyń Qosúıeńki turady. Ómir boıy temir-tersektiń ortasynda júrse de ústine temir jabysatynyn jeti-segiz jyl buryn ǵana bilgen. Onda da kezdeısoq.
— Úı ishimizben teledıdar kórip otyrǵanbyz. Telehabarlardyń birinde keıipker denesine qasyq, shanyshqy, útik, taǵy basqa buıymdardy japsyryp jatyr eken. Ony kórgen nemerem tańǵaldy. Júgirip baryp asúıden qasyq, shanyshqy ákep tur. Ózine baıqap kórgen, jabysqan joq. Qoıarda-qoımaı meni kóndirdi. Qyzyq bolǵanda jalańash deneme magnıtke jabysqandaı tura qaldy. Ózim de ań-tańmyn, — dedi «magnıt-adam».
Názirhan Ótepbergenovti «temir-tersektiń ortasynda júrgen» deıtinimiz, jastaıynan kólik tizgininde.
— Máshineniń asaı-múseıi, tipti útikke deıin tósime, kókiregim, jaýyrynyma tura qalady. Ujymdastarym eń aýyr kiltterdi qaz-qatar tizip qoıyp, qyzyq kórip, vıdeoǵa túsirdi. Senbegenderge sony kórsetem. Mundaı qasıet ázirge nemerelerimniń bireýinen ǵana baıqaldy, — dedi keıipkerimiz.
Jalańash denesine temir-tersek jabysqanymen ol kisiniń boıynda Nartaı Tursanovqa tán emshilik qasıet joq eken.
Buǵan deıin biz Qazanǵap atyndaǵy Qyzylorda mýzykalyq joǵary kolledjiniń 4-kýrs stýdenti Nursultan Ikramovtyń erekshe hobbıi týraly jazǵanbyz.Ol úsh jyldan beri úıinde jylan asyraıdy.