Qyzylordalyq qutqarýshylar kásipkerlerdi pırotehnıkany ruqsatpen satýǵa shaqyrdy
QYZYLORDA. KAZINFORM — Qyzylorda oblystyq tótenshe jaǵdaılar jáne polıtsııa departamentteri 5 jeltoqsanda «Pırotehnıka» jedel profılaktıkalyq is-sharasyn bastady.
Іs-shara jańa jyl merekesi qarsańynda adam ómiri men densaýlyǵyn, múlik pen qorshaǵan ortany órtten jáne túrli tótenshe jaǵdaılardan qorǵaýǵa baǵyttalǵan.
— Adamdar kóp shoǵyrlanǵan oryndar men saýda ortalyqtarynda reıdter uıymdastyryp, kásipkerler men turǵyndarǵa órt qaýipsizdiginiń mańyzyn túsindirip júrmiz. Búginge deıin ruqsatsyz pırotehnıkalyq buıymdar satqandarǵa qatysty 3 ákimshilik hattama rásimdeldi. 150 myń teńgege jýyq aıyppul salyndy, — dedi oblystyq tótenshe jaǵdaılar departamenti memlekettik órt baqylaý basqarmasy bastyǵynyń mindetin atqarýshy Arman Dastenov.
Jyl basynan beri oblys aýmaǵynda 432 órt oqıǵasy tirkeldi. Sonyń saldarynan 6 adam qaza bolyp, 10 adam túrli dene jaraqatyn aldy. Turǵyndarǵa 259 mln teńgeden astam materıaldyq shyǵyn kelgen.
— Oqys jaǵdaılardyń 10%-y nemese 45-i kásipkerlik nysandarynda tirkelgen. Taldaý nátıjesine súıensek, tilsiz jaýdyń basym bóligi menshik ıelerininiń órt qaýipsizdigi talaptaryna salǵyrt qaraýynan, ıaǵnı elektr symdary men quraldaryna ýaqytyly tekseris júrgizbeýinen, belgilenbegen oryndarda temeki shegý nemese ashyq ot kózin paıdalanýynan bolyp otyr. Oblys turǵyndary men kásipkerlerden jańa jyl merekesin atap ótý jáne pırotehnıkalyq buıymdardy qoldaný barysynda qaýipsizdik sharalaryn qatań saqtaýdy suraımyz, — dedi Arman Dastenov.
Al pırotehnıkalyq buıymdar ishki ister organdarynyń ruqsatymen ǵana satylýy tıis.
Aıta keteıik, Jambyl oblysynda da pırotehnıkalyq ónimderdi zańsyz satý faktilerin anyqtaý jáne aldyn alý maqsatynda profılaktıkalyq reıd júrip jatyr.