Qyzylordalyq qutqarýshylar eki kún dalada qalǵan jolaýshylarǵa kómekke keldi
QYZYLORDA. KAZINFORM — Qyzylorda oblystyq tótenshe jaǵdaılar departamentiniń 112 qyzmetine oblys aýmaǵyndaǵy tasjoldan alysta kólik qalyp qoıǵany týraly dabyldy habarlama tústi.
Departamenttiń baspasóz qyzmeti málim etkendeı, temir tulpar tasjoldan 35 shaqyrym qashyqtyqta, ıaǵnı jetý qıyn Telikól aımaǵynda turyp qalǵan. Іshindegi adamdar eki kún boıy dalada qonýǵa májbúr bolǵan. Olar óz kúshimen shyǵa almaǵan soń qutqarýshylar kómegine júgingen.
– Іzdestirý jumysy joldyń joqtyǵy men batpaq bolýy saldarynan kúrdelene tústi. Zardap shekkenderge jetý úshin joǵary ótimdi tehnıka jumyldyryldy. Aýmaqty áýeden barlaý úshin ushqyshsyz ushý apparaty qoldanylyp, úılestirý spýtnıktik baılanys arqyly júrgizildi. Tańerteń izdestirý toby tórt er adamdy taýyp aldy. Qutqarýshylar olardy daladan evakýatsııalap, oblys ortalyǵyna jetkizdi. Eshkimge medıtsınalyq kómek qajet bolǵan joq, – delingen habarlamada.
Buǵan deıin Abaı oblysynda Tótenshe jaǵdaılar mınıstrligi, oblystyq polıtsııa departamenti jáne jergilikti atqarýshy organdardyń birlesken kúshi taýda adasyp ketken 1989 jyly týǵan er adamdy izdep tapqan edi.
