Qyzylordalyq qos stýdent qaýipti saıttardy anyqtaıtyn baǵdarlama jasady
QYZYLORDA. KAZINFORM – Nurbol Ońalbekov pen Nurbek Ábildaev Qorqyt ata atyndaǵy Qyzylorda ýnıversıteti jasandy ıntellekt ınstıtýtynyń 2-kýrsynda oqyp júr. Stýdentter jýyrda qaýipti saıttar men siltemelerdi anyqtaıtyn baǵdarlama ázirledi. Kazinform tilshisi onyń tıimdiligi jóninde baǵdarlama avtorymen sóılesti.
PhishGuard AI – fıshıng pen tsıfrlyq alaıaqtyqqa qarsy naqty ýaqyt rejıminde jumys isteıtin ıntellektýaldy qorǵanys júıesi.
– Platforma veb-resýrstar men tólem betterin taldap, jalǵan saıttardy, kúmándi derekter engizý formalaryn jáne áleýmettik ınjenerııa belgilerin anyqtaıdy. Kópdeńgeıli taldaý negizinde táýekel deńgeıi eseptelip, paıdalanýshyǵa túsinikti qorytyndy beriledi. Júıe fondyq rejımde jumys isteıdi. Qoldanýshynyń tájirıbesine kedergi keltirmeıdi. Joba tsıfrlyq qarjylyq operatsııalar men ózara onlaın árekettesýdiń qaýipsizdigin arttyrýǵa baǵyttalǵan, - dedi Nurbol Ońalbekov.
Búginde ınternet alaıaqtaryna aldanyp, opyq jep júrgen adam kóp. Іzdenimpaz jastar osyndaı qaýiptiń aldyn alý baǵytynda bir aı boıy jumys istegen.
– Braýzerlik kosymsha saıttyń qaýipti ekenin anyqtasa, dereý jaýyp tastaıdy. Keıin qoldanýshy ol saıtqa kire almaıdy. Mysaly, keıbir tanymal saýda úıleriniń atynan «sizge syılyq buıyrdy» degen mazmunda silteme kelip jatady. Habarlamada ol úshin aqparat toltyrýdy nemese qarjy jiberýdi suraıdy. Mine, sol kezde osy qosymshanyń kómegimen saıtty teksere alasyz. Munyń alaıaqtar jasaǵan nemese tekserilgen, senýge bolatyn silteme ekenine kóz jetkizesiz, - dedi jas tehnokrat.
Intellektýaldy qorǵanys júıesiniń avtorlary jýyrda InnoFest Qyzylorda ınnovatsııalyq jobalar festıvalinde 2-orynǵa ıe boldy. Búginde olar jobany jetildirip jatyr. Birneshe márte synaqtan ótip, oń nátıje bergen qosymshany oblystyq polıtsııa departamenti sol kezde qoldanyp kórýge nıetti.
Buǵan deıin biz Qyzylorda oblysy Syrdarııa aýdanynyń Shaǵan aýylyndaǵy №37 mektep-lıtseıdiń 7-synybynda oqıtyn Nurıslam Aıbekulynyń uıaly telefonǵa arnalǵan qaýipsiz júıe oılap tapqanyn jazǵanbyz.