Qyzylordalyq kıkboksshy eki dúrkin álem chempıony atandy

QYZYLORDA. KAZINFORM – 21-30 qarasha aralyǵynda Birikken Arab Ámirlikteriniń astanasy Abý-Dabı qalasynda eresekter arasynda álem chempıonaty ótti.

Dúnıejúzilik dodada kıkboksıngten Qazaqstan quramasynyń múshesi, qyzylordalyq Nurasyl Tilektesov 51 kılogramm salmaq dárejesinde tórt kezdesý ótkizip, barlyǵynda qarsylastaryn aıqyn basymdyqpen jeńdi. Sóıtip, eki jylda bir ret uıymdastyrylatyn kıkboksıng sportynan tuńǵysh ret eki dúrkin álem chempıony atandy. Bul – Qyzylorda oblysynyń tarıhynda jerlesimiz qol jetkizgen tuńǵysh tarıhı jetistik. 

- Jarysqa 85 elden myńǵa jýyq ókil qatysty. Men Túrkimenstan, Ýkraına, Vengrııa jáne Ázirbaıjannan kelgen qarsylastarmen synǵa tústim. Qaı-qaısysy da óte myqty boldy. Degenmen, bárin aıqyn basymdyqpen jeńdim, - dedi Nurasyl Tilektesov. 

21 jastaǵy chempıon Qorqyt ata atyndaǵy Qyzylorda ýnıversıtetinde oqyp júr. Ol buǵan deıin Azııa jáne álem kýboktarynyń, Qazaqstan Respýblıkasynyń birneshe dúrkin chempıony jáne halyqaralyq týrnırlerdiń júldegeri atanǵan. Talantty sportshy osylaısha el mereıin talaı márte asqaqtatyp úlgerdi. 

Bul jolǵy jahandyq jarysqa onymen birge Qyzylorda oblysynan taǵy bir kıkboksshy Dıas Qarmanov qatysyp, 2-oryndy enshiledi. 

Aıta keteıik, Nurasyldyń alǵashqy jattyqtyrýshysy Nurbek Jarmahanov bolsa, qazirgi jeke bapkeri – Qaırat Baıqýatov.

Al jýyrda jasóspirimder arasyndaǵy karateden álem chempıonatynda otandasymyz Arýjan Shákeı el qorjynyna altyn saldy.