Qyzylordalyq kásipkerler 252,2 mln teńge grant qarjysyn ońdy-soldy shashqan
QYZYLORDA. KAZINFORM – 2023-2025 jyldary Qyzylorda oblysynda sýbsıdııalanatyn jumys oryndaryn uıymdastyrǵan 5111 mekeme men uıymdarǵa monıtorıng júrgizildi.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń habarlaýynsha, monıtorıng barysynda 466 jumys berýshimen jasalǵan kelisim-sharttar merziminen buryn toqtatyldy.
— 36 mekemege joldanǵan 56 adam jumysta bolmasa da jumys berýshiler jalǵan tabel tapsyrǵan. Olar sóıtip 20,2 mln teńge jalaqy alǵan. Tekserý nátıjesinde 43 adam 12,4 mln teńgeni bıýdjetke keri qaıtardy. 12 adamnyń isi sot oryndaýshylar óndirisinde, 1 adamnan bıýdjet qarjysyn sot tártibimen keri qaıtarýǵa talap-aryz berildi. Osylaısha 686 mln teńgeniń maqsatsyz jumsalýyna tosqaýyl qoıdyq, — dedi basqarma basshysy Ǵabıt Jańabaev.
Byltyr 372 adam sýbsıdııalanǵan jumys oryndarynan bosatylyp, 264,7 mln teńge bıýdjette qaldy. Memlekettik grant qarajatynyń ornymen jumsalýy da nazarda. Baqylaý jumysynyń arqasynda 188 kásipkerdiń 252,2 mln teńge bıýdjet qarajatyn ońdy-soldy shashqany anyqtaldy. Olar portalda jalǵan shot faktýralar, júk qujattaryn, fıskaldy chekter men túbirtekter usynǵan. Biraq bıznes jospar boıynsha satyp alynýy tıis qural- jabdyqtardy satyp almaǵan.
— 34 adam aqshany óz erkimen qaıtardy, 154 adamnyń is qujattary sot qaraýyna joldandy. 139 adamnan 209,9 mln teńge grant qarajatyn bıýdjet paıdasyna óndirý týraly sot sheshimderi shyqty. 15 adamǵa qatysty sot protsesteri jalǵasyp jatyr, — dedi basqarma basshysy.
Eske salaıyq, ótken jyly Qyzylorda oblysynyń memlekettik eńbek ınspektorlary tekserý nátıjesinde 348 zańbuzýshylyqty anyqtady.