Qyzylordalyq ǵalymdar qoıdyń quıryq maıynan ylǵaldandyrǵysh krem jasady
QYZYLORDA. KAZINFORM — Qorqyt ata atyndaǵy Qyzylorda ýnıversıtetiniń ǵalymdary qoıdyń quıryq maıynan ylǵaldandyrǵysh krem ázirlep, ǵylymı jetistikke patent aldy.
Bul — ýnıversıtettiń Tolybek Qýanyshbaev atyndaǵy hımııa-bıologııalyq zertteý ǵylymı-bilim berý ortalyǵynyń qoldanbaly ǵylymı zertteýi nátıjesinde jasalǵan alǵashqy tabıǵı organıkalyq ónim.
Zertteýge ortalyqtyń bas ǵylymı qyzmetkeri, hımııa ǵylymdarynyń kandıdaty Gúlmıra Abyzbekova, aǵa ǵylymı qyzmetkerler, hımııa ǵylymdarynyń kandıdaty Gúljan Balyqbaeva, bıologııa ǵylymdarynyń kandıdaty Raıhan Jandáýletova, tehnıka ǵylymdarynyń kandıdaty Sholpan Espenbetova jáne Anıpa Tapalova, pedagogıka ǵylymdarynyń kandıdaty Karıma Arynova, jas zertteýshi, 4-kýrs stýdenti Arýjan Talǵatova qatysty.
Syr óńiriniń kontınentaldy klımaty men ekologııalyq faktorlary terini tez qurǵatyp jiberetini belgili. Ǵalymdar toby osy máseleni tabıǵı jolmen sheshýdi kózdegen.
— Kremge tek 5 tabıǵı komponent kiredi. Qoıdyń quıryq maıy quramyndaǵy tabıǵı maı qyshqyly men sterın teriniń eń tereń jasýshalyq qabattaryna ótip, sý-tuz balansyn qalpyna keltiretini dáleldengen. Ol terini ylǵaldandyryp qana qoımaı, basqa da paıdaly zattardy teriniń ishki qabatyna ótkizý qabiletine ıe. Jasýshalardyń jańarýyn tezdetedi. Júzim tuqymynyń maıy — terini qorektendirip, jarany jazatyn antıoksıdant. Ara balaýyzy kremniń jumsaq qurylymyn túzip, terini syrtqy jel men sýyqtan qorǵaıdy. Jalbyz jáne lavanda efır maıy — tabıǵı antıseptık, qabynýdy basady, hosh ıis beredi jáne bulshyqetti bosańsytady. Basqa kremderde sıntetıkalyq konservant, spırt nemese artyq dárýmender bolýy múmkin. Bul keıde terini titirkendirip, dárýmendi shamadan tys kóbeıtedi. Bizdiń ónim tolyq organıkalyq, hımııalyq qospa nemese spırt qosylmaǵan, — dedi Gúlmıra Abyzbekova.
Ónimniń qaýipsizdigi Almaty qalasyndaǵy synaq ortalyǵynyń akkredıttelgen zerthanasynda arnaıy saraptamadan ótti. Quramynan myshıak, synap, qorǵasyn sııaqty ýly zattar, mıkroorganızmder men bakterııalar tabylmady. «Terini titirkendirmeıdi, allergııa týdyrmaıdy, pH kórsetkishi (6,1) teriniń tabıǵı ortasyna tolyq sáıkes keledi» dep qorytyndy berilgen.
Patent avtory toń maıdyń nelikten kosmetıka óndirisinde keńinen qoldanylmaı kele jatqanyn túsindirdi.
— Onyń ózine tán erekshe ıisi men tyǵyz, aýyr tekstýrasy bar. Durys óńdelmese, terige baıaý sińip, maıly jyltyr iz qaldyrady. Bizdiń ǵalymdar quıryq maıyn júzim tuqymy jáne efır maılarymen dál proportsııada sınergııalyq túrde biriktirý arqyly jaǵymsyz ıisti ketirip, jumsaq, jaǵymdy ári jyldam sińetin zamanaýı konsıstentsııa aldy. Sheteldik tutynýshylar úshin janýar maıy negizindegi kosmetıka tańsyq bolýy múmkin. Óıtkeni batys elderinde vegandyq kosmetıka trendi qatty damyǵan. Halyqaralyq naryqqa shyǵý úshin ónimniń tabıǵılyǵyn, qaýipsizdigin halyqaralyq ISO jáne ECO-sertıfıkattarmen dáleldep, saýatty marketıng ádisimen túsindirý qajet. Sondyqtan ónimniń eko-tazalyǵyn ǵylymı aǵartýshylyq jolmen túsindirý kerek, — dedi ǵalym.
Patent alý — ǵylymı ıdeıanyń jumys isteıtinin jáne onyń jańa ekenin dáleldeýdiń bastapqy kezeńi. Ǵalymdar aldaǵy ýaqytta kremdi óndiriske engizip, el ıgiligine usynýdy kózdep otyr.
Jýyrda astanalyq oqýshy Zaına Júsipbekova túıejapyraq pen qalaqaıdan tolyq ydyraıtyn ekologııalyq qaǵaz jasaý jobasyn ázirlep, «Qazpatentten» eki patent alǵan edi.
