Qyzylordalyq ǵalym jylyjaıda banan men lımon ósiredi
QYZYLORDA. KAZINFORM - Qyzylordalyq Aqerke Keńesbaıqyzy 23 jyldan beri jylyjaı sharýashylyǵymen aınalysady. Keıingi úsh jylda ol tropıkalyq jemis aǵashtaryn egýdi qolǵa alǵan.
Aqerke Keńesbaıqyzy Qyzylordadaǵy «Bolashaq» ýnıversıtetinde aǵa oqytýshy bolyp qyzmet atqarady, aýyl sharýashylyǵy ǵylymdarynyń magıstri.
Baǵban jylyjaıda negizinen qııar, qyzanaq, qyryqqabat ósiredi. Sondaı-aq, olardyń qatarynda lımon men banan da alystan menmundalap tur.
«Syr óńirinde jylyjaı sharýashylyǵy keńinen damymaı tur. Onyń birneshe sebebi bar. Uzaq jyl boıy daladaǵy egis alqabynda eńbek etken agronom jylyjaıda jumys istep kete almaıdy. Óıtkeni, jylyjaı — basqa álem. Sondyqtan bul salanyń qyr-syryn jaqsy biletin tájirıbeli mamandar az dep sanaımyn. Bul ispen aınalysqysy kelgen azamattar mamandardyń kómegine júgingeni durys», — deıdi ol.
Onyń aıtýynsha, jylyjaıdyń jumys jasap turǵanyna bes-alty jyldyń júzi bolǵan. Árbir jemis túrine aıryqsha qamqorlyq qajet.
«Qııar men qyzanaqtyń 5-6 túrin ósiremiz. Sondaı-aq, qulpynaıdyń da qyr-syryn bilemiz. Úsh jyl buryn lımon ósirýge qyzyǵýshylyq paıda boldy. Ózbekstannan lımonnyń kóshetterin alyp keldik. Alaıda ony ósirýge múmkindik bolǵan joq. Odan keıin Saryaǵashta osy tirlikpen aınalysyp júrgen baǵbanǵa baryp, tájirıbe almastyq. Osydan keıin maǵan „Nege Saryǵashta ósken ósimdik Qyzylordada óspeıdi“ degen oı keldi. Sóıtip, ol jaqtan 40 túp kóshet alyp keldik. Ony „Bolashaq“ ýnıversıtetiniń jylyjaıyna otyrǵyzdyq. Qazir barlyǵy alyp tur. Ony kútip-baptaýdy tolyq zerttedik. Buǵan baılanysty bizden aqyl-keńes alyp júrgender bar», - deıdi ol.
Sondaı-aq, atalǵan jylyjaıda ósip jatqan banan da kózdiń jaýyn alady.
«Meniń oıymsha, tıisti talabyn saqtaı alsańyz, jylyjaıda barlyǵyn ósirýge bolady. Ol úshin oǵan qajetti jaǵdaıdy jasaýyń tıis. Máselen, banandy 2-3 aı buryn ekken edik. Ol da boıyn tiktep, jylyjaıda ósetinin dáleldeı tústi. Endi úsh aıdan keıin gúldeı bastaıdy degen boljam bar. Banan aldymen gúldep, 8-9 aıdan keıin tolyq pisedi. Banan men lımondy jeýge ábden bolady. Bazardaǵy ónimnen tátti ekenin baıqaımyz», — dedi Aqerke Keńesbaıqyzy.
