Qyzylordalyq dıqandar agrodrondar kómegimen kúrish egedi
QYZYLORDA. KAZINFORM — Qyzylorda oblysynda kúrish egý naýqany bastaldy. Dıqandar bıyl 30-dan astam kúrish sortyn baıqap kórmek.
Oblystyq aýyl sharýashylyǵy jáne jer qatynastary basqarmasynyń málimetine súıensek, jumys barysynda tyń tehnologııalar, onyń ishinde agrodrondar qoldanylady. Bul pestıtsıdter, tyńaıtqyshtar men gerbıtsıdter shyǵynyn aıtarlyqtaı azaıtýǵa múmkindik beredi.
Sondaı-aq kúrishti kóshettep egý tásili de tıimdiligin kórsetip otyr. Bul ádisti Y.Jaqaev atyndaǵy qazaq kúrish sharýashylyǵy ǵylymı zertteý ınstıtýty 2021 jyly sýdy únemdeý maqsatynda alǵash ret qoldanysqa engizgen bolatyn. Sol jyly japon tehnologııasy negizinde 155 gektar jerge kúrish kóshettep egildi. Dıqandar osylaısha sý shyǵynyn 20%-ǵa, dán sebý normasyn 80%-ǵa únemdemek. Bıyl Qytaı, Túrkııa jáne Eýropa elderinen ákelingen tuqym túrleri sebilip, jersindiriledi.
— Bıyl oblysta sý únemdeý tehnologııalaryn paıdalaný arqyly egis kólemin 9200 gektarǵa jetkizý, ótken jylmen salystyrǵanda 2 ese arttyrý mejelengen. Bul baǵytta memlekettik qoldaý sharalary qarastyrylǵan. Jabdyqtardy satyp alýǵa jáne qurýǵa ketken shyǵyndardyń 80%-na deıin memleket tarapynan sýbsıdııalanady. Sońǵy jyldary 55 myń gektar kúrish alqaby lazerlik ádispen tegisteldi. Bıyl bul kólem 60 myń gektarǵa deıin jetkiziledi, — dedi oblystyq aýyl sharýashylyǵy jáne jer qatynastary basqarmasynyń basshysy Talǵat Dúısebaev.
Aıta keteıik, bıyl Qyzylorda oblysynda 193,7 myń gektar jerge aýyl sharýashylyǵy daqyldaryn egý josparlansa, sonyń 85,6 myń gektary — kúrish.