Qyzylordalyq dıqandar 470 myń tonnaǵa jýyq kúrish jınady
QYZYLORDA. KAZINFORM – Qyzylorda oblysynda egin orý jáne jınaý naýqany aıaqtaldy. Bul týraly oblystyq aýyl sharýashylyǵy jáne jer qatynastary basqarmasynyń baspasóz qyzmeti málimdedi.
Bıyl Qyzylorda oblysynda 189,6 myń gektar jerge aýyl sharýashylyǵy daqyldary, onyń ishinde 80,9 myń gektar jerge kúrish egildi. Egin jınaý naýqanyna 4 myńnan astam tehnıka tartyldy. Al agropark qatary 139 jańa tehnıkamen tolyqty.
— Nátıjesinde qyzmet sapasy jetilip, ónimdilik artty. Syrboıylyq dıqandar kúzgi jıyn-terimge ýaqytyly kirisip, tolaǵaı tabysqa qol jetkizdi. Kúzgi jıyn-terim kezinde 470 myń tonnaǵa jýyq ónimdi qambaǵa quıyp, kúrishtiń ár gektarynan 58,1 tsentnerden ónim aldy, — delingen habarlamada.
Sondaı-aq kúrishten basqa 13 myń tonna dándi daqyl jınaldy. Onyń 5,6 myń tonnasy — maıly daqyldar, kartop, kókónis, 380 myń tonnasy — baqsha daqyldary, 358 myń tonnasy — mal azyǵy túrindegi daqyldar.
Aıta keteıik, jýyrda Y.Jaqaev atyndaǵy Qazaq kúrish sharýashylyǵy ǵylymı-zertteý ınstıtýtyn jetildirýge respýblıkalyq bıýdjetten 4,1 mlrd teńge bólinetini belgili boldy.