Qyzylordalyq dárigerler patsıenttiń júreginen sırek kezdesetin isikti aldy

QYZYLORDA. KAZINFORM — Qyzylorda oblystyq kópbeıindi aýrýhanasynda ashyq júrekke sırek kezdesetin ota jasaldy. Dárigerler mıksoma dep atalatyn qatersiz isikti alyp tastady.

Bul týraly áleýmettik medıtsınalyq saqtandyrý qorynyń oblystyq fılıaly habarlady. 

Patsıent Záýre Asanovanyń ish qýysyndaǵy negizgi arterııalardyń biri bitelip qalyp, hırýrgter qan uıyǵyshtaryn alyp tastaýǵa májbúr boldy.

— Qosymsha tekserýden soń patsıentte kólemi 6×5 santımetr bolatyn sol jaq júrekshe mıksomasy anyqtaldy. Sondyqtan jasandy qan aınalymyn qoldaný arqyly ashyq júrekke joǵary tehnologııaly ota jasaldy. Dárigerler isikti sol kúıi alyp tastady, — delingen habarlamada.

Ota sátti ótti. 49 jastaǵy patsıent qazir medıtsınalyq ońaltý satysynda. 

— Tynysym tarylyp, basym aınala beretin, aıaqtarym uıyp qalatyn. MÁMS aıasynda tegin ota jasalyp, jaǵdaıym jaqsardy, — dedi Záýre Asanova.

Aýrýhananyń kardıohırýrgııa bóliminiń meńgerýshisi Berik Dáýitbaevtyń aıtýynsha, mıksoma — sırek kezdesetin patologııa, mundaı ota oblysta jylyna 1-2 ret qana jasalady.

— Quny — shamamen 3,5 mıllıon teńge. Barlyq shyǵyn áleýmettik medıtsınalyq saqtandyrý qorynyń esebinen óteledi. Jyl basynan beri ashyq júrekke shamamen 70 ota jasadyq. Onyń kóbi — aortokoronarlyq shýnttaý men júrek qaqpaqshalaryn aýystyrý, — dedi Berik Dáýitbaev.

Aıta keteıik, bıyl óńirdiń densaýlyq saqtaý júıesine 117,4 mlrd teńge qarjy bólinip, onyń 57,1 mlrd teńgesi turǵyndarǵa MÁMS aıasynda qyzmet kórsetýge jumsaldy.