Qyzylordalyq dárigerler patsıentten sırek kezdesetin túzilim aldy
QYZYLORDA. KAZINFORM – Qyzylorda kópbeıindi oblystyq aýrýhanasynda qursaq qýysy artyndaǵy úlken túzilimdi alyp tastaý boıynsha ota jasaldy. Bul týraly Áleýmettik medıtsınalyq saqtandyrý qorynyń Qyzylorda oblystyq fılıalynan habarlady.
56 jastaǵy Altynbek Fazylovty búıregi mazalap júrgenine biraz bolǵan. Sońǵy bes jylda dárigerler ondaǵy túzilimdi alý úshin úsh ret ota jasaǵan. Jýyrda oblystyq aýrýhana hırýrgtary qursaq qýysy artynan 25 santımetrlik túzilim aldy.
— Belim aýyryp, aıaqtarym qatty isip, basqa da jaǵdaılar mazalady. Ota jasatyp edim, qazir jaqsymyn. MÁMS arqyly tegin em alyp jatyrmyn — dedi Altynbek Fazylov.
Kúrdeli otany hırýrgtar Jasulan Baımahanov, Erbol Serikuly, Áset Jalmaǵanbetov jasady. Dárigerler munyń óte sırek kezdesetin túzilim ekenin aıtyp otyr. Mundaı jaǵdaı barlyq búırek aýrýynyń 1%-ynda ǵana kezdesedi eken.
— Patsıent emin júıeli túrde jalǵastyrsa, mundaı túzilim qaıtadan paıda bolmaıdy. Otanyń quny — 310 myń teńge, elimizde Áleýmettik medıtsınalyq saqtandyrý qory esebinen tegin jasalady. Mysaly, kórshiles Ózbekstanda mundaı otanyń 90%-yn naýqastyń ózi tóleıdi, — dedi aýrýhana dırektorynyń orynbasary Erbol Serikuly.
Al jaqynda otandyq medıtsına tarıhynda tuńǵysh A. N. Syzǵanov atyndaǵy ulttyq ǵylymı hırýrgııa ortalyǵy bazasynda professor Bolatbek Baımahanovtyń jetekshiligimen transplantolog dárigerler komandasy búırekti úshtik aıqas transplantatsııa jasady.