Qyzylordalyq dárigerler Eýropada biliktiligin arttyrdy

ASTANA. KAZINFORM — Qyzylorda oblysynda sońǵy úsh jylda densaýlyq saqtaý salasyna 441 mlrd teńge bólingen. «Aýylda densaýlyq saqtaýdy jańǵyrtý» ulttyq jobasy aıasynda oblystyń barlyq aýdanynda 10,7 mlrd teńgege 28 medıtsınalyq nysan salynǵan. Bul týraly óńir ákimi Nurlybek Nálibaev eseptik kezdesýinde aıtyp berdi. 

— Qyzylorda qalasynda 36,4 mlrd teńgege 300 oryndyq kópbeıindi aýrýhana ortalyǵy salynyp jatyr. Tórt aýdandaǵy ortalyq aýrýhanalar janynan 5,4 mlrd teńgege japsarlas ǵımarattar salyndy. Shıeli jáne Aral aýdandarynda 4,5 mlrd teńgege juqpaly aýrýlar bólimshesiniń jańa ǵımaraty salyndy. Taǵy 2,7 mlrd teńgege Qan ortalyǵy ashylyp, jumysyn bastap ketti, — dedi N. Nálibaev elordada Ortalyq kommýnıkatsııalar qyzmetinde.

Oblys ortalyǵynda 48,5 mlrd teńgege 200 oryndyq perınataldyq ortalyq ǵımaraty men 146,7 mlrd teńgege 500 oryndyq emhanany salýǵa Úkimet qaýlysy qabyldandy. Jaqyn kúnderi qurylys jumystary bastalady.

Budan bólek, Qyzylorda qalasynda 10 mlrd teńgege 400 oryndyq emhananyń qurylysy bastalady.

— Turǵyndarymyzdyń suranysyna sáıkes, sońǵy 2 jylda jergilikti bıýdjetten 5 mlrd 400 mln teńgege 225 dana jańa sanıtarlyq avtokólik, 45 jedel járdem kóligi alyndy. Óńirdegi barlyq eldi mekendegi densaýlyq saqtaý uıymdary arnaıy qyzmettik avtokóliktermen 100 paıyz qamtamasyz etildi, — dep tolyqtyrdy oblys ákimi.

Sonymen birge, oblystaǵy densaýlyq saqtaý mekemelerine 15 mlrd teńgege medıtsınalyq qural-jabdyqtar satyp alyndy, 6 mlrd teńgege 24 medıtsınalyq nysan kúrdeli jóndeýden ótkizildi.

Aımaqtaǵy densaýlyq saqtaý uıymdarynyń jabdyqtalý deńgeıi 2022 jyly 83,2% bolsa, bıyl bul kórsetkish 87,4% jetken.

— Turǵyndarǵa sapaly medıtsınalyq qyzmet kórsetý úshin mamandarymyzdyń biliktiligin arttyrý udaıy nazarymyzda. Ótken jyly 15 dáriger mamandarymyz Túrkııanyń jetekshi medıtsınalyq klınıkasynda bilimderin jetildirdi. Bıyl 41 medıtsınalyq qyzmetkerimiz Germanııa, Reseı, Lıtva, Belarýs elderindegi úzdik dárigerlik klınıkalarda biliktilikterin arttyrdy, — dedi N. Nálibaev.

Buǵan deıin Nurlybek Nálibaev Qyzylordanyń qaı aýdandarynda jańa mektepter men Oqýshylar saraıy salynǵanyn baıandaǵan edi.