Qyzylordalyq dárigerler bir kúnde úsh adamnyń búıregin aýystyrdy

QYZYLORDA. KAZINFORM – Qyzylorda oblystyq kópbeıindi aýrýhanasynda bir kúnde úsh naýqasqa búırek transplantatsııasy sátti jasaldy. Bul týraly aýrýhananyń baspasóz qyzmeti habarlady.

Alǵashqy transplantatsııa 41 jastaǵy áıel adamǵa jasaldy. 

- Retsıpıenttiń aǵasy donor bolyp, baýyryna búıregin berdi. Ekinshi transplantatsııa 20 jastaǵy jigitke jasaldy. Bul jaǵdaıda donor retinde naýqastyń 54 jastaǵy anasy qatysty. Al úshinshi ota 43 jastaǵy áıel adamǵa jasaldy. Naýqastyń jubaıy donor bolyp, búıregin berdi, - delingen habarlamada. 

Transplantatsııany aýrýhananyń bas dárigeri, transplantolog, PhD Jasulan Baımahanov, bas dárigerdiń hırýrgııa jónindegi orynbasary, PhD Erbol Serikuly jáne A.N.Syzǵanov atyndaǵy ulttyq ǵylymı hırýrgııa ortalyǵynyń transplantologtary Ernur Belgibaev, Elshat Nábıevtiń komandasy jasady.

- Ota sátti ótti. Qazirgi tańda naýqastardyń jaǵdaıy ortasha aýyr, tıisti em qabyldap jatyr, - delingen habarlamada. 

Aıta ketý kerek, buǵan deıin aýrýhanada 8 ret búırek, 1 baýyr almastyrý otasy sátti jasaldy.

Eske salsaq, búginde Qazaqstanda aǵza aýystyrýǵa muqtaj 4 myńnan astam adam bar.