Qyzylordalyq búldirshinderge Prezıdenttiń jańajyldyq syılyǵy jetkizildi
Jańa jyl árbir búldirshinniń asyǵa kútetin merekesi. Osy merekede Memleket basshysy Qasym-Jomart Toqaev qyzylordalyq balalarǵa merekelik syılyq jiberdi, dep habarlaıdy Kazinform.
Mereke qarsańynda Prezıdentke hat jazǵan balalarǵa El basshysynyń arnaıy quttyqtaýy men syılyǵyn shahar basshysy Asylbek Shámenov pen oblystyq bilim basqarmasynyń basshysy Asqarbek Esjanov tabystady. Al erekshe bilim berýdi qajet etetin 14 jasar Salabat Nurdáýletke uıaly telefon berildi.
- Jańa jyl qarsańynda El Prezıdentiniń arnaıy syılyǵy men merekelik quttyqtaýyn tabystaýǵa arnaıy keldik. Bul meıram balalar úshin óte erekshe ekeni belgili. Barlyq armanyn qaǵazǵa túrtip, jańa jyldyq syılyqtar kútedi. Al osyndaı mezette Memleket basshysynyń ózi búldirshinderdi qýantyp, arnaıy syılyǵyn jiberip jatyr. Merekelik tartýdy qabyl alyńyzdar. Jańa 2024 jyl barshalaryńyzǵa qutty bolsyn!, - dedi qala ákimi Asylbek Shámenov.
«Atameken» balalar úıindegi búldirshinder de merekelik syılyqtan qur qalmady. Ondaǵy barsha búldirshinderge táttiler berilip, Prezıdentke hat jazǵan Roman Dmıtrıevke arnaıy syılyq tabystaldy.
- Men 6 jasymnan bastap, «Atameken» balalar aýylynda turamyn. Mektepte jaqsy oqyp, belsendi bolýǵa tyrysamyn. Kishkentaı kezimnen ónerge, onyń ishinde bı bıleýge qyzyǵyp óstim. Osy qyzyǵýshylyǵymnyń arqasynda Máskeý qalasynda ótken «Ty sýper tantsy» telejobasyna qatystym. Jańa jyl qarsańynda Prezıdentimizge hat jazyp, óz armanymdy jetkizdim. Búgin minekeı, Memleket basshysynyń syılyǵyn alyp qýanyp jatyrmyn. Endigi armanym El Prezıdentimen kezdesip, qolyn alǵym keledi, - depti Roman Sergeıuly Prezıdentke jazǵan hatynan.
Memleket basshysy ózi kelip, júzdese almasa da, sálemdemesin qala ákimi arqyly jetkizdi. Roman Sergeıulyna Prezıdent atynan quttyqtaý tilek pen túrli syılyqtar jáne planshet tabystaldy. Sonymen-qatar, «Atameken» balalar úıiniń búldirshinderi dombyrany shertip, merekelik kóńil kúı syılady.
Buǵan qosa, Syrdarııa aýdanynyń ákimi Berik Sármenbaev Prezıdent syılyǵyn óz aýdanyndaǵy Ernar Ybyraıǵa da tabystady. Bul Jańa jyl qarsańynda balalarǵa bazarlyq, merekelik kóńil-kúı syılaýdaǵy izgi is dep bilemiz.
