Astanaǵa jumys isteýge ketken qyzylordalyq qyz jumbaq jaǵdaıda kóz jumdy
QYZYLORDA. KAZINFORM – Qyzylorda qalasynan Astanaǵa jumys isteýge barǵan boıjetken jumbaq jaǵdaıda qaıtys boldy.
Marqumnyń qurbysy Threads áleýmettik jelisinde Nazym 26 tamyz kúni óz-ózine qol jumsaǵany týraly sýyt habar jetkenin jazdy.
- Nazym Astanada Aıaýlym esimdi qyzylordalyq tanysymen aralasyp turǵan. Jaqyn eshkimi bolmaǵandyqtan kóp ýaqytyn sol qyzben birge ótkizedi. Nazym qaıtys bolǵan túni Aıaýlymmen birge bolǵan. Nazymnyń qurbylary júktegen beınejazbada ol úıdiń emes, podezdiń terezesinen sekirgeni jáne úıden jalańaıaq qashyp shyqqany kórinedi, - delingen beınejazbada.
Jazba avtory Aıaýlymnyń qurbysy kóz jumǵannan keıin arada bir saǵat ótken soń ǵana jedel járdem shaqyrýy kúmán týdyratynyn aıtyp otyr. Marqumnyń sýıtsıd jasaǵanyna týystary da, dostary da senbeıtinin atap ótti.
Kazinform tilshisiniń resmı saýalyna baılanysty Astana qalalyq polıtsııa departamenti túsindirme berdi.
- Atalǵan faktige sáıkes departamenttiń Esil aýdandyq polıtsııa basqarmasy ózin-ózi óltirýge deıin jetkizý (Qylmystyq kodekstiń 105-baby) deregi boıynsha sotqa deıingi tergep-tekserý bastaldy. Qazirgi tańda qylmystyq is sheńberinde oqıǵanyń barlyq mán-jaıyn anyqtaýǵa baǵyttalǵan tıisti tergeý áreketteri jáne sot saraptamalary júrgizilip jatyr. Sonyń qorytyndysymen quqyqbuzýshylyqtyń sebepteri anyqtalady, - delingen departament habarlamasynda.
Polıtsııa ázirge kúdikti anyqtalmaǵanyn alǵa tartty.
- Qylmystyq-protsestik kodeksiniń 201-babynyń talabyna sáıkes sotqa deıingi tergep-tekserý derekteri jarııa etilmeıdi. Osyǵan baılanysty júrgizilip jatqan tergeý áreketteri men onyń nátıjesi týraly ózge aqparat aıtylmaıdy, - delingen habarlamada.
Eske salaıyq, buǵan deıin Jambyl oblysynyń Merki aýdanynda 19 jastaǵy Mádına Rashıdqyzy otbasylyq janjaldan keıin kóz jumdy.
