Qyzylordalyq balýan ardagerler arasynda álem chempıony atandy
QYZYLORDA. KAZINFORM – Qyzylordalyq balýan Samat Ospan Iordanııanyń astanasy Amman qalasynda ardager sportshylar arasynda ótken álem chempıonatynda grek-rım kúresinen altyn medal jeńip aldy.
Álemdik dodaǵa 42 eldiń sportshylary qatysyp, ózara myqtyny anyqtady. 62 kılogramm salmaq dárejesinde beldesken jerlesimiz qarsylastaryn jeńip, jarys jeńimpazy atandy.
- Alǵashqy beldesýimde Vengrııa sportshysynan basym tússem, keıin Reseı men Belarýs ókilderin jeńdim. Aqtyq synda taǵy bir reseılik balýanmen kezdesip, aıqyn basymdyqpen jeńiske jettim, - dedi chempıon.
Samat Ospan Qazaly aýdanyndaǵy №17 Olımpıada rezerviniń balalar men jasóspirimderge arnalǵan mamandandyrylǵan sport mektebinde jattyqtyrýshy bolyp jumys isteıdi. Dúbirli dodaǵa shákirt tárbıeleı júrip ózi daıyndalǵan.
Eske salaıyq, 1-4 qazan aralyǵynda Grekııanyń Salonıkı qalasynda sambodan Álem chempıonaty ótip, Ahmet Islam álem chempıony atandy.
