Qyzylordalyq ákeniń alımenti 8 mln teńgeden asyp ketken
QYZYLORDA. KAZINFORM – Qyzylorda oblysynda alıment tólemegeni úshin boryshkerdiń bas bostandyǵy shekteldi. Bul týraly oblystyq prokýratýranyń baspasóz qyzmeti habarlady.
Syrdarııa aýdanynyń prokýratýrasy kámeletke tolmaǵan balalarǵa alıment tóleýden qasaqana jaltarǵan turǵynǵa qatysty QR Qylmystyq kodeksiniń 139-baby boıynsha sotqa deıingi tergep-tekserýdi bastady.
– Alıment tóleýge múmkindigi bola tura ol 9 jyl boıy mindetin oryndamaı, áreketsizdik tanytqan. 2016 jyldan bastap bereshek somasy 8 173 713 teńgege jetken. Qyzylorda oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń 2025 jylǵy 26 mamyrdaǵy úkimimen boryshker QR QK-niń 139-baby boıynsha kináli dep tanylyp, 1 jyl merzimge bas bostandyǵyn shekteý jazasy taǵaıyndaldy. Úkim zańdy kúshine engen joq, - delingen habarlamada.
Buǵan deıin Shymkent qalasynda prokýratýra ýákiletti organdarmen birlesip, alıment óndirýge baǵyttalǵan reıdtik is-sharalar ótkizdi.