Ahmet Islam sambodan álem chempıony atandy
QYZYLORDA. KAZINFORM – 1-4 qazan aralyǵynda Gretsııanyń Salonıkı qalasynda sambodan Álem chempıonaty ótti. Oǵan 40-tan astam elden 700-ge jýyq jas sportshy qatysty.
Oblystyq dene shynyqtyrý jáne sport basqarmasynyń baspasóz qyzmeti habarlaǵandaı, dúbirli dodada qyzylordalyq Ahmet Islam qarsylas shydatpaı, 49 kılogramm salmaq dárejesinde 1-oryndy jeńip aldy.
Sportshyny chempıonatqa Abaı Ábishev daıyndady.
- Ahmettiń úlken jarys jolyna deıingi jetistikteri bir tóbe. Ol – sambo kúresinen Qazaqstan Respýblıkasynyń eki dúrkin, qazaq kúresinen bir dúrkin jeńimpazy. Sambodan Azııa jáne álem chempıonatynda, qazaq kúresinen jasóspirimder arasyndaǵy Azııa chempıonatynda top jardy.
Sondaı-aq sambo kúresinen kadetter arasyndaǵy álem chempıony atanǵan tuńǵysh qazaq balasy, - dedi bapkeri.
Aıta keteıik, beldesýlerde uldar men qyzdar sporttyq sambodan, sondaı-aq jasóspirimder arasyndaǵy jaýyngerlik sambodan (Combat SAMBO) baq synasty. Barlyǵy 55 medal jıyntyǵy sarapqa salyndy.
Buǵan deıin 21-27 qyrkúıek aralyǵynda Rýmynııanyń Býharest qalasynda ótken toǵyzqumalaqtan kezekti VIII álem chempıonatynda jerlesimiz Ermuhamed Áláıdar álem chempıony atandy.
