Qyzylordaǵa Qytaıdan jumys isteýge keletinder kóp

QYZYLORDA. KAZINFORM — Qyzylorda oblysynda 2025 jyly sheteldik jumys kúshin tartýǵa 598 kvota bólindi.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetine súıensek, óńirde 38 birlesken kásiporyn jumys atqarady. Onda eńbek etetin otandastarymyzdyń sany 9400-ge jýyq. 300-den astam sheteldik ruqsatpen jumysqa tartylǵan bolsa, sonyń ishinde Qytaı (264) men Túrkııa (45) azamattarynyń salmaǵy basym. Bıyl sheteldik jumys kúshin tartýǵa 288 ruqsat berildi. 

— Qandas mártebesin berý jáne uzartý qyzmeti boıynsha aımaǵymyzǵa oralǵan 14 etnıkalyq qazaqqa (11 otbasy) qandas mártebesi berildi. Olar Ózbekstan (12), Qytaı (1), Túrikmenstannan (1) kelgen. 3 adamnyń qandas mártebesi uzartyldy, — dedi basqarma basshysynyń orynbasary Janar Dáýletbaeva.

Buǵan deıin habarlaǵanymyzdaı, Qyzylorda oblysynda jyl basynan beri memleket kómegin negizsiz alǵandar sany 33,1%-ǵa tómendedi.