Qyzylordadan Ózbekstan shekarasyna deıin jańa jol qashan salynady – Úkimet basshysy jaýaby
ASTANA. KAZINFORM — Qyzylorda — Ózbekstan shekarasy jańa jol ýchaskesin salýǵa shamamen 140 mlrd teńge qajet. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
— Qyzylorda — Úshqudyq baǵytynyń jalpy qashyqtyǵy 320 shaqyrymdy quraıdy, onyń ishinde Qazaqstan Respýblıkasynyn aýmaǵy arqyly — 140 shaqyrym, Ózbekstan aýmaǵynda — 180 shaqyrym. Qyzylorda — Ózbekstan shekarasy jańa jol ýchaskesi qurylysynyń quny shamamen 140 mlrd teńgeni quraıdy. Shekarada avtomobıl ótkizý pýnkti joq. Sondyqtan mundaı pýnkt salý qajet ekenin aıtyp ótken jón. Onyń quny shamamen 15 mlrd teńge bolady, — dedi Úkimet basshysy jaýabynda.
Premer-Mınıstrdiń dereginshe, Aqtóbe — Ulǵaısyn (Aqtóbe — Hromtaý avtojolynyń 763-791 shaqyrym ýchaskesi) jol ýchaskesin rekonstrýktsııalaý bastaldy. Bıyl qalǵan 234 shaqyrymda Azııa ınfraqurylymdyq ınvestıtsııalar bankiniń qaryz qarajaty esebinen qurylys jumystaryn bastaý kózdelgen. Sondaı-aq 2025 jyly uzyndyǵy 513 shaqyrym Qaraǵandy — Jezqazǵan avtojolyn qaıta jańartý jáne uzyndyǵy 102 shaqyrym Saryaǵash qalasyn aınalyp ótetin joldyń qurylysy josparlanǵan. Budan basqa, Memleket basshysy 2025 jylǵy 14 naýryzdaǵy Ulttyq quryltaıdyń tórtinshi otyrysynda Astanadan Arqalyq, Torǵaı jáne Yrǵyz arqyly Transkaspıı halyqaralyq kólik baǵytyna týra shyǵatyn avtomobıl jolyn salý jónindegi jobany iske asyrýdy bastaýdy tapsyrdy.
— Baıandalǵannyń negizinde kólik ınfraqurylymyn damytý boıynsha bekitilgen josparlar men júrgizilip jatqan jumystardy eskere otyryp, Qyzylorda — Úshqudyq avtojolyn salý máselesin qaraýdy 2029 jylǵa deıingi Ulttyq ınfraqurylymdyq josparda kózdelgen jobalardy iske asyrý aıaqtalǵan soń qaraý usynylady, — dedi ol.
Býrabaıda ótken Ulttyq quryltaıdyń IV otyrysynda Memleket basshysy Qasym-Jomart Toqaev Úkimetke Astanadan Arqalyq, Torǵaı jáne Yrǵyz arqyly Transkaspıı halyqaralyq kólik dálizine týra shyǵatyn avtokólik jolynyń qurylysyn bastaýdy tapsyrǵan edi.