Qyzylordadaǵy jasóspirim ólimi: daýly vıdeodaǵy áıeldiń qylmysqa qatysy bar ma
QYZYLORDA. KAZINFORM – Qyzylorda qalasynda 14 jastaǵy jasóspirimniń qaza tabýyna qatysty beınejazba keıipkeri kútpegen málimdeme jasady.
Aıtýynsha, áleýmettik jeli qoldanýshylary talqylap jatqan beıneúzindi týraly aqparat shyndyqqa janaspaıdy jáne onyń qaıǵyly oqıǵamen tikeleı baılanysy joq. Jazba múldem basqa ýaqytta túsirilgen jáne bul másele tolyq sheshilgen.
- Iá, ol oqıǵa 4 qazan kúni bolǵan. Ózara janjaldasyp qalǵanymyz ras. Biraq artynan ata-anasynyń ruqsatymen bir-birimizben kelisimge kelgenbiz. Ol kezde is jabylǵan bolatyn. Bul beınejazbanyń 21 qazandaǵy balanyń ólimine eshqandaı qatysy joq, - dep málimdedi azamatsha.
Sonymen qatar ol qaıǵyly oqıǵa kúni múldem basqa jerde bolǵanyn jáne oǵan eshqandaı qatysy joq ekenin alǵa tartty.
- Men ol kúni, ıaǵnı 21 qazanda múldem jumysta bolǵan emespin. Úıde, balalarymnyń qasynda boldym. Sondyqtan bul vıdeony balanyń ólimine qatystyrmaýdy suraımyn. Meniń bul balanyń ólimine eshqandaı qatysym joq, – dep túsindirdi ol.
Jergilikti zań kompanııasy da bul beınejazbanyń ókinishti oqıǵadan 17 kún buryn túsirilgenin jáne materıaldar buryn ákimshilik sotta qaralǵanyn rastap otyr.
- Qandaı da bir tulǵanyń qylmysqa qatystylyǵy týraly dáleldenbegen tujyrymdar jasaýdan saq bolýǵa shaqyramyz. Qylmystyq is boıynsha túpkilikti quqyqtyq baǵany tek ýákiletti organdar men sot beredi, - delingen kompanııa taratqan habarlamada.
Eske salaıyq, marqumnyń ápkesi buǵan deıin qaıǵyly oqıǵadan bir apta buryn baýyry jumys berýshi áıel uryp-soqqanyn aıtyp, sol jaǵdaıǵa qatysty vıdeo áleýmettik jelide taralǵanyn málimdedi.
Polıtsııa kámeletke tolmaǵannyń abaısyzda ólimine ákep soqqan qasaqana aýyr dene jaraqatyn keltirý deregi boıynsha qylmystyq isti tergep jatyr.
