Qyzylordadaǵy janýarlarǵa dıagnostıkalyq tekseris júıeli júrgizilýde

Qyzylorda oblysynda jyl basynan beri 1625,9 myń bas janýarǵa dıagnostıkalyq tekseris júrgizildi, dep habarlaıdy Kazinform.

Nátıjesinde, 10 aılyq jospardyń oryndalýy boıynsha Qyzylorda oblysy respýblıkada aldyńǵy qatardan oryn aldy. Bul týraly Óńirlik kommýnıkatsııalar qyzmetiniń aqparat alańynda oblystyq veterınarııa basqarmasynyń basshysy Shahmardan Qoıshybaev aıtty.

- Aýyl sharýashylyǵy janýarlaryn birdeılendirý jumystary qarqyndy júrgizilýde. 2023 jyldyń 1 qarashasyna deıin aqparattyq júıede 1656,4 myń bas janýar tirkelip, byltyrǵymen salystyrǵanda 5,1 paıyzǵa ósti. Sondaı-aq, bıyl 463,8 myń dana qulaq japsyrmasy oblysqa jetkizildi. Budan bólek, aımaq basshysynyń qoldaýymen byltyr tıisti qarajat bólinip, veterınar mamandarynyń eńbekaqysy 40 paıyzǵa kóterildi. Sonyń arqasynda kadr tapshylyǵy azaıyp keledi. Veterınarııalyq stantsııalarymyzdyń materıaldyq-tehnıkalyq bazasy da jańartylýda. Bıyl 30 avtokólik, 23 dana termochemodan, 23 kompıýter jıyntyǵy satyp alyndy. Sondaı-aq, qazan aıynda aımaq basshysy veterınarııalyq uıymdarǵa 30 dana jańa avtokóliktiń kiltin tabystady, - dedi basqarma basshysy Shahmardan Qoıshybaev.