Qyzylordadaǵy Táýelsizdikke 25 jyl dańǵylynyń jalǵasy salynyp jatyr
QYZYLORDA. KAZINFORM – Qyzylorda qalasynyń damý qarqyny kún sanap artyp keledi. Sonyń aıǵaǵy retinde búgingi kúni qala turǵyndary úshin asa mańyzdy jańa jol qurylysy qolǵa alyndy.
Táýelsizdikke 25 jyl dańǵylynyń jalǵasy sanalatyn bul jol Ábilqaıyr han kóshesinen bastalyp, Salamatov kóshesine deıingi aralyqty qamtıdy. Uzyndyǵy 2,9 shaqyrymdy quraıtyn jol qurylysy zamanaýı talaptarǵa saı júrgizilip jatyr. Jańa baǵyttyń iske qosylýy qaladaǵy kólik qozǵalysyn jeńildetip qana qoımaı, ortalyq jáne shetki aımaqtardy baılanystyratyn mańyzdy magıstralge aınalmaq.
Qurylys barysynda tek jol salý jumystary ǵana emes, sonymen qatar Syrdarııa ózeniniń qorǵanys bógetin nyǵaıtý da qatar júrgizilýde. Bul óz kezeginde óńirdiń ekologııalyq jáne qaýipsizdik turǵysynan turaqtylyǵyn qamtamasyz etýge múmkindik beredi.
Jańa jolda tórt jolaqty keń avtojol salý josparlanǵan. Sonymen birge turǵyndardyń qolaıly qozǵalysy úshin eni 6 metrdi quraıtyn jaıaý júrginshiler joly men arnaıy velosıped jolaqtary da qarastyrylǵan. Bul qala turǵyndarynyń salaýatty ómir saltyn ustanýyna qolaıly jaǵdaı týǵyzady.
Jobany júzege asyrý jumystaryn tájirıbesi mol «ÝAD» JShS atqaryp jatyr. Qazirgi tańda qurylys alańynda zamanaýı tehnıkalar tartylyp, ondaǵan jumysshy kúndiz-túni eńbektenýde. Merdiger kompanııa josparǵa sáıkes jumysty sapaly ári ýaqtyly aıaqtaýdy maqsat etip otyr.
Atalǵan jol qurylysy aıaqtalǵan soń, qaladaǵy kólik qozǵalysynyń júktemesi edáýir azaıyp, turǵyndardyń júrip-turýy áldeqaıda yńǵaıly bolmaq. Sonymen qatar bul joba Qyzylordanyń sáýlettik kelbetin jańǵyrtyp, ınfraqurylymdyq áleýetin kúsheıtýge jol ashady. Qala halqy úshin qolaıly ári qaýipsiz orta qalyptastyrý baǵytyndaǵy ıgi bastamalardyń biri sanalatyn bul dańǵyldyń jalǵasy bolashaqta aımaqtyń damýyna zor serpin beretini anyq.
Osy qurylys tek jol salý jumystary ǵana emes, qala ómiriniń jańa tynysyn ashatyn mańyzdy qadam ekeni sózsiz. Táýelsizdikke 25 jyl dańǵylynyń jalǵasy – Syr óńiriniń áleýmettik-ekonomıkalyq damýynyń aıqyn kórsetkishi ári turǵyndar úshin jasalyp jatqan ıgilikti isterdiń bir parasy.