Qyzylordadaǵy shyny zaýyty qalaı jumys istep tur – ákim esebi

Qyzylordadaǵy shyny zaýyty janynan 8 túrli shyny buıymdaryn shyǵaratyn ilespe kásiporyndar qurylady. Bul týraly oblys ákimi Nurlybek Nálibaev elordada eseptik kezdesýinde aıtty, dep habarlaıdy Kazinform.

«Byltyr iske qosylǵan shyny zaýyty turaqty ónim shyǵaryp, ónimniń 70 paıyzyn ishki naryqqa, 30 paıyzyn – Reseı, Ózbekstan, Qyrǵyzstan, Tájikstan, Túrikmenstan elderine eksporttaýda. Zaýyttyń negizi qýaty – 197 myń tonna, zaýyt ashylǵaly jobalyq qýattyń 85 paıyzyn ıgerip, 167 myń tonna ónim shyǵardy. Shyny zaýytynyń aıasynda shaǵyn jáne orta kásipkerlik beldeýin damytýǵa múmkindikter mol. Zaýyt janynan quny 130 mlrd teńgeden asatyn 8 túrli shyny buıymdaryn shyǵaratyn 8 ilespe kásiporyn qurylady», - dedi Nurlybek Nálibaev Ortalyq kommýnıkatsııalar qyzmetinde ótken baspasóz máslıhatynda.

Óńir ákiminiń aıtýynsha, kelesi jyly jylyna qosymsha 5 mln sharshy metr energııa únemdeıtin shyny óndirisi iske qosylyp, shyny bótelkeler jáne alǵashqy aına zaýytynyń qurylysy bastalady. Bul 3 jobanyń jalpy quny 32,3 mlrd teńge.

«Shyny bótelkeler jobasyn júzege asyrýǵa Qazaqstan men Germanııa memleketteri basshylarynyń qatysýymen ótken bıznes forýmda qol jetkizdik. Quny 1 mlrd teńgeni quraıtyn ák jáne qurǵaq qurylys qospalaryn shyǵarý tsehy iske qosyldy. 2024 jyly aımaqta quny 27,1 mlrd teńgeni quraıtyn 10 joba júzege asyrylady», - dedi N. Nálibaev.

Aıta keteıik, aldaǵy 6 jylda Qyzylorda oblysynda 65 joba iske qosylyp, 9 myńǵa jýyq jańa jumys orny ashylady.