Qyzylordadaǵy órt shyqqan munaı óńdeý zaýyty aýmaǵynda aýa sapasy tekserildi
QYZYLORDA. KAZINFORM — Qyzylorda oblystyq ekologııa departamentiniń mamandary 7 qyrkúıek kúngi órtten keıin Qyzylorda qalasyndaǵy shaǵyn tonnajdy munaı óńdeý zaýytynyń aýmaǵynda baqylaý jumysyn júrgizdi.
«Kyzylorda refinery» aýmaǵynda jalpy kólemi 120 tonna munaı saqtalǵan eki rezervýar janǵan.
— Zerthanalyq-taldamaly baqylaý bóliminiń mamandary kásiporynnyń sanıtarııalyq qorǵaý aımaǵynda atmosferalyq aýadan synamalar aldy. Jeldiń bolmaýyna baılanysty tútin shleıfi negizinen tik baǵytta taralyp, bul lastaýshy zattardyń atmosferanyń joǵarǵy qabattarynda seıilýine yqpal etti. Júrgizilgen monıtorıng nátıjesi boıynsha atmosferalyq aýanyń belgilengen sapa normatıvterinen asyp ketý faktileri anyqtalǵan joq, — delingen habarlamada.
Eske salaıyq, órt sóndirýshilerdiń jedel ári úılesimdi is-qımylynyń arqasynda jalynnyń taralýyna jol berilmeı, janyndaǵy úsh rezervýar saqtalyp qaldy.
