Qyzylordadaǵy orny anyqtalmaǵan sibir jarasynyń kómindileri reestrden alynýy múmkin
QYZYLORDA. KAZINFORM – Qyzylorda oblysynda sibir jarasynyń 57 kómindisi bar.
Oblystyq veterınarııa basqarmasynyń málimetinshe, olar talapqa sáıkes betonmen qorshalyp, qaýipsizdik belgileri qoıylǵan.
- Memlekettik jer kadastrlyq nómirleri alynyp, 32,2 mln teńgege sanıtarlyq qorǵanysh aımaǵy belgilendi. Orny anyqtalmaǵan 7 kómindini anyqtaý maqsatynda jumys toby qurylyp, Qazaq ǵylymı-zertteý veterınarııa ınstıtýtynyń ǵalymdarymen birge tıisti jumys atqaryldy. Atap aıtqanda, muraǵat qorynan epızootııalyq derekter, eldi mekenderdegi kónekóz qarııalar men veterınarııa salasynyń ardagerlerinen túsinikteme alyndy. Nátıjesinde koordınattary naqtylanbaǵany, rastalmaǵany týraly qorytyndy akt jasalyp, Aýyl sharýashylyǵy mınıstrligine kómindilerdi reestrden alý týraly usynys berildi, - delingen habarlamada.
Buǵan deıin biz Memleket basshysy Qasym-Jomart Toqaevtyń 2026 jylǵy 10 aqpanda ótken Úkimettiń keńeıtilgen otyrysynda bergen tapsyrmalaryn oryndaý aıasynda mal sharýashylyǵynyń turaqty damýyn qamtamasyz etý úshin sapaly veterınarııalyq qaýipsizdik júıesin qalyptastyrý maqsatynda QR Úkimeti 2026 – 2030 jyldarǵa arnalǵan veterınarııany damytýdyń keshendi josparyn bekitkenin jazdyq.
