Qyzylordadaǵy orman alqabyn 83% sekseýil alyp jatyr

QYZYLORDA. KAZINFORM — Qyzylorda oblysynda 3,8 mln gektar ormandy alqap bar, sonyń 83%-yn sekseýil aǵashy alyp jatyr.

Oblystyq tabıǵı resýrstar jáne tabıǵat paıdalanýdy retteý basqarmasynyń málimetinshe, 2025 jyly kóktemde 50 myń gektar jerge sekseýil egildi.

— Qazirgi kezde Aral teńiziniń qurǵaǵan ultanyndaǵy 50 myń gektar jerge qarabaraq, sekseýil egý úshin 217,5 tonna tuqym jınalyp, sebilip jatyr. 13250 gektar aýmaqta 4 mln sekseýil kósheti qazyldy. Aral teńiziniń qurǵaǵan ultanynda fıtoorman melıoratsııa jumysyn júrgizýge qajet sekseýil kóshetterin ósiretin 150 gektar ýaqytsha orman tuqymbaǵy uıymdastyryldy. 150 myń gektar jerdiń topyraǵyn zertteýge jáne jobalaýǵa oblystyq bıýdjetten 58,4 mln teńge bólindi, — delingen basqarmanyń habarlamasynda.

Memlekettik orman qory ýchaskelerinde júrgizilgen reıdter nátıjesinde bir jylda orman tártibin buzýdyń 52 deregi anyqtaldy. Orman mekemelerine 146,7 mln teńge bıýdjet qarajaty esebinen tehnıka men qural- saımandar satyp alyndy.

— Aldaǵy ýaqytta 158 gektar ýaqytsha orman tuqymbaǵyn uıymdastyrý, 302 myń gektar jerge orman patologııalyq zertteý júrgizý josparlanyp otyr, — delingen habarlamada. 

Aıta keteıik, Qyzylorda oblysynyń Aral aýdanynda Memleket basshysynyń 2021-2025 jyldar ishinde Aral teńiziniń qurǵaǵan ultanynda 1,1 mln gektar jerge sekseýil egý týraly tapsyrmasy jalǵasyn taýyp keledi.