Qyzylordadaǵy munaı óńdeý zaýytynda eki rezervýar órtendi
QYZYLORDA. KAZINFORM — Qyzylorda qalasynyń Mustafa Shoqaı kóshesinde ornalasqan shaǵyn tonnajdy munaı óńdeý zaýyttarynyń biriniń aýmaǵynda árqaısysynyń syıymdylyǵy 60 tonna eki rezervýar órtendi. Oqıǵa 7 qyrkúıek kúni saǵat 16.25 mınýt shamasynda tirkeldi.
Oblystyq tótenshe jaǵdaılar departamenti habarlaǵandaı, ekeýinde jalpy kólemi 120 tonna munaı ónimi bolǵan.
— Alǵashqy órt sóndirý bólimsheleri kelgen kezde rezervýarlar ashyq jalynmen janyp jatqan. Órttiń janynda ornalasqan taǵy úsh rezervýarǵa taralý qaýpi týyndady. Órtti sóndirýge TJM, jergilikti atqarýshy organdar jáne basqa da qyzmet kúshteri men quraldary jumyldyryldy. Oqıǵa ornynda órt sóndirý shtaby quryldy. Kórshiles rezervýarlardy qorǵaý úshin tasymaldy lafettik oqpandar berilip, kóbikpen shabýyl jasaldy. Qosymsha órt sóndirý poıyzy tartyldy, — delingen habarlamada.
Órt sóndirýshilerdiń jedel ári úılesimdi is-qımylynyń arqasynda jalynnyń taralýyna jol berilmeı, janyndaǵy úsh rezervýar saqtalyp qaldy.
Qutqarýshylar 200 sharshy metr aýmaqtaǵy tilsiz jaýdy tolyq aýyzdyqtady. Qazirgi kúni onyń neden shyqqanyn anyqtap jatyr. Zertteý órt synaq zerthanasynda júrgiziledi.
Búgin sondaı-aq Almaty oblysyndaǵy Іle ormanshylyǵynda 5 qyrkúıekte tirkelgen orman órti 7 qyrkúıek saǵat 17:48–de tolyq sóndirilgenin jazdyq.
