Qyzylordadaǵy mektebi joq 47 aýyldyń balalary qalaı oqıdy
QYZYLORDA. KAZINFORM – Jańa oqý jylynda Qyzylorda oblysynyń mektepterinde 190 myńnan astam bala bilim alady.
Oblystyq bilim basqarmasynyń josparyna sáıkes 17 700 bala 1-synyptyń tabaldyryǵyn attaıdy. Onyń 93%-y qazaq, qalǵany orys mektepterine tirkelgen.
- Bıyl 1,3 mlrd teńge qarjy bólinip, 31 mektepke aǵymdaǵy jóndeý jumysy júrgizilip jatyr. Jóndeý jumysy Bilim kúnine deıin tolyǵymen aıaqtalyp, mektepter balalardy qabyldaýǵa daıyn bolady. Oblys boıynsha jańa oqý jylynda paıdalanýǵa beriletin mektepter joq, - dedi basqarma basshysynyń orynbasary Ashat Qanatov.
Basqarma mektepterdiń daıyndyǵyn tekserý kezinde eshqandaı kemshilik anyqtalmaǵanyn málimdedi. Mektepterde kadr tapshylyǵy baıqalmaıdy. Kerisinshe muǵalim sanynyń artyq bolýyna baılanysty oblys ákiminiń tapsyrmasyna sáıkes 2023 jyldan bastap orta bilim berý uıymdarynda pedagog qabyldaýǵa moratorıı jarııalanǵan.
Óńirdegi 53 oqý oshaǵynda 60 avtokólik 6 400-ge jýyq balany tasymaldaıdy.
- Mektebi joq 47 eldi mekende mektep jasyndaǵy 727 bala tirkelgen. Onyń 545-ine kúndelikti tasymal uıymdastyrylsa, qalǵan 182-si týystarynyń úıinen mektepke qatynaıdy. Avtokólikterdiń júrý kestesin mektep dırektory jergilikti ákimshilik polıtsııamen kelisimdi túrde bekitken. Kólik júrgizýshileri – jumys ótili bes jyldan joǵary tájirıbeli mamandar. Bilim bólimderine avtokólikterdi beınetirkeýmen jáne GPS-monıtorıng júıelerimen qamtamasyz etý týraly tapsyrma berildi, onyń oryndalýy baqylaýda, - dedi basqarma ókili.
Balabaqsha, mektep, kolledjderde túgel beınebaqylaý júıesi ornatylǵan. Zań talabyna sáıkes bala sany 700-den asatyn bilim berý uıymdaryna týrnıket qoıylyp, lıtsenzııalanǵan kúzetpen qamtamasyz etilgen.
Oqý-aǵartý, Tsıfrlyq damý, ınnovatsııalar jáne aeroǵarysh ónerkásibi mınıstrlikteriniń buıryǵyna sáıkes oqýshy sany 400-ge deıingi bilim oshaqtarynda ınternet jyldamdyǵy sekýndyna 20 Mbıt-ten kem bolmaýy kerek ekeni týraly talap bar.
- Bıyl maýsym aıynda eldi mekenderdegi 37 mektep StarLink spýtnıktik tehnologııasyna qosyldy. Qazirgi tańda ınternet jyldamdyǵy sekýndyna 300 Mbıt-pen jumys isteıdi. Mektep baǵdarlamasy boıynsha jasalǵan ınteraktıvti sabaqtardy, muǵalimderge arnalǵan kórneki vırtýaldy zerthanany paıdalaný maqsatynda 230 memlekettik mektep 100% «BilimLand» tsıfrly bilim berý portalyna qosylǵan. Ony paıdalaný barysynda oqýshylar UBT-ǵa daıyndaıtyn iTest.kz vırtýaldy jattyǵý alańynyń kómegine júgine alady, - dedi Ashat Qanatov.
Buǵan deıin biz Batys Qazaqstan oblysyndaǵy mektepterdiń jańa oqý jylyna daıyndyǵy, jóndeý júrgizilip jatqan bilim nysandaryndaǵy jaǵdaı týraly jazǵanbyz.
