Qyzylordadaǵy «Qorqyt ata» áýejaıy júk taspasy nege buzylyp qaldy

QYZYLORDA. KAZINFORM - Qyzylorda qalasyndaǵy «Qorqyt ata» áýejaıy júk taspasy buzylyp qalǵan. Sonyń saldarynan jolaýshylarǵa zattary júk kóliginen tereze arqyly tikeleı beriledi.

Atalǵan oqıǵaǵa baılanysty áleýmettik jelide beınejazba jarııalandy. Beınejazbada júk taspasyn júrgizýdi mamandar qolmen atqaryp jatqany kórinis tapqan. Bul jóninde halyqaralyq «Qorqyt ata» áýejaıynyń dırektory Baıan Ájmoldaev túsindirip berdi.

«2024 jyly 18 shildede júk taspasy aqaýdyń bolýyna baılanysty demontajdalǵan. Júk taspasy qosalqy bólshekter satyp alynyp, jóndeýden ótkennen keıin ornatylady. Aıta ketsek, ol qoldan jasalǵan, ony jeti jyl buryn kásipker áýejaıǵa syılyq retinde usynǵan. Júk taspasyn ornatqannan keıin ol birneshe ret jóndeýden ótken. Degenmen qaıta isten shyǵyp otyr», - dedi ol.

Onyń aıtýynsha, júk taspasy qoldan jasalǵan. Sondyqtan qyzmet etýi uzaq merzimge eseptelmegen.

«Osyǵan baılanysty oǵan qosalqy bólshekterdi izdeý jáne jóndeý jumystary qıynǵa soǵýda. Jaqynda jolaýshylar úshin barlyq halyqaralyq standarttarǵa saı jabdyqtalǵan jańa termınal ashylady», - dep tolyqtyrdy ol.

Eske salsaq, «Qyzylorda-Jezqazǵan» jolynyń Qyzylorda oblysyndaǵy 140 shaqyrymǵa jýyq bóligi paıdalanýǵa beriledi.