Qyzylordadaǵy kóptegen qoqys polıgony talapqa saı emes

QYZYLORDA. KAZINFORM – Qyzylorda oblysynda ruqsatsyz qaldyq tastalǵan oryndardy ǵaryshtyq monıtorıng arqyly anyqtaý 2018 jyly bastaldy.

Oblystyq ekologııa departamentiniń málimetinshe, 2025 jyly osyndaı ádispen 113 oryn anyqtalyp, respýblıkada alǵashqylardyń biri bolyp azǵantaı ýaqytta qoqystan tazartyldy. 

- «Baıqońyr» keshenindegi obektilerdi baqylaý da bizdiń quzyrymyzda. Ótken jyly 17 obektini teksergenbiz, 13 zańbuzýshylyq tirkeldi. Olardy joıý jóninde uıǵarym berilip, tolyǵymen oryndaldy. Búginde oblystaǵy qaldyqtardy suryptaý jáne óńdeý salasynda 10 joba júzege asyrylyp jatyr. Jospar boıynsha onyń 9-yn «Jasyl damý» aktsıonerlik qoǵamy qarjylandyrady, - dedi departament basshysynyń orynbasary Almas Ysqaqov. 

Oblysta 145 qoqys polıgony bar, sonyń 7-inde ǵana ekologııalyq talaptarǵa sáıkes keletini jóninde ruqsat qujattary bar. Departament ókili bul kórsetkishtiń nege tym tómen ekenin túsindirdi. 

- Nege qalǵan polıgondar ekologııalyq talapqa sáıkes kelmeıdi? Óıtkeni úlken bolsyn, kishi bolsyn, qalada ma, aýylda ma, oǵan da qaramastan polıgondardyń barlyǵyna qoıylatyn talap birdeı. Sondyqtan mınıstrlikte osy talapty ózgertý múmkindigi qarastyrylyp jatyr. Sol kezde talapqa saı keletin polıgondardyń kórsetkishi artady, - dedi Almas Ysqaqov. 

Buǵan deıin biz Túrkistan oblysynda 247 zańsyz qoqys orny anyqtalǵanyn jazǵanbyz.