Qyzylordadaǵy kópqabatty úıler tolyǵymen ystyq sýmen qamtylady – Nálibaev
ASTANA. KAZINFORM – Qyzylorda qalasyndaǵy jańa jylý elektr ortalyǵynyń qurylysy aıaqtalýǵa jaqyndady. Bul týraly Jibek Joly telearnasynyń «Ýáde» baǵdarlamasynda Qyzylorda oblysynyń ákimi Nurlybek Nálibaev málim etti.
– Burynǵy jylý elektr ortalyǵy 1964 jyly salynǵan. Sondaǵy 9 qazandyqtyń ekeýi ǵana jumys istep tur. Al 6 týrbogeneratordyń bireýi iske qosylǵan, ıaǵnı osy stansanyń ábden tozyǵy jetken. 2022 jyly Memleket basshysynyń Túrkııaǵa issapary kezindegi kelisimniń arqasynda Aksa Energy túrik kompanııasy Qyzylordaǵa keldi. Osy oraıda 2023 jyldyń ortasynda onyń qurylysyn bastap ketti. 2026 jyldyń tamyz aıynda jylý elektr ortalyǵynyń qurylysy aıaqtalýy kerek. Aksa Energy bul jobany merziminen buryn aıaqtap jatyr, - dedi N. Nálibaev.
Osy oraıda ol joba quny 215 mlrd teńge ekenin, qýaty 240 megavattqa jetetinin eske saldy.
– Joba aıaqtalýǵa jaqyndady. Bizdiń oblys osyǵan deıin elektr energııasyna táýeldi bolsa, ende basqa óńirlerge energııa satýǵa múmkindik bolady. JEO qalany tolyqtaı jylýmen qamtamasyz etedi, - dedi óńir ákimi.
Sonymen qatar ol jyldyń aıaǵyna deıin qaladaǵy kópqabatty úıler ortalyqtandyrylǵan ystyq sýmen tolyq qamtamasyz etiletinin aıtty.
Eske salsaq, Prezıdenttiń Qatar eline jumys sapary aıasyndaǵy úkimetaralyq kelisimge sáıkes ońtústik óńirlerde elektr energııasynyń tapshylyǵyn boldyrmaý maqsatynda qýaty 1 100 MVt, quny 892 mlrd teńge bolatyn bý-gaz qondyrǵysyn salý kelisildi. Megajoba 2028 jyly tolyǵymen iske qosylady.
– «Samuryq-Energo» men Qatar holdıngi jobany iske asyrý úshin kelisimge qol qoıdy. Bul rette Syrdarııa aýdanynyń aýmaǵynda 250 gektar jerdi bóldik. Qurylys keler jyly bastalap, 2028 jyldyń aıaǵynda paıdalanýǵa berilýi tıis. Bul jobanyń aıasynda túsetin salyqtyń kólemi edáýir artady, - dedi Nurlybek Nálibaev.
Budan buryn habarlanǵandaı, bıyl 30 qazanda Memleket basshysy Qyzylordadaǵy jańa jylý elektr ortalyǵyna bardy.