Qyzylordadaǵy keptelisi kóp kópir máselesi qalaı sheshiledi
QYZYLORDA. KAZINFORM – Qyzylorda qalasynan Aqtóbe oblysynyń shekarasyna deıingi 566 shaqyrym jol 1-shi sanatqa aýystyrylady.
Oblystyq jolaýshylar kóligi jáne avtomobıl joldary basqarmasynyń málimetine súıensek, onyń jobalyq-smetalyq qujattamasyn «QazAvtoJol» mekemesi ázirledi.
– Joba quny – 879 mlrd 191 mln teńge. Qazirgi tańda Islamdyq damý banki arqyly qarajat kózin tartý, merdigerlerdi anyqtaý múmkindigi qarastyrylyp jatyr. Sekseýil-Beıneý avtomobıl jolynyń qurylysyn jedeldetýge de kúsh salamyz. Uzyndyǵy 559 shaqyrym joldyń 189 shaqyrymy Aral aýdanynyń Qulandy, Aqbasty, Aqespe, Qosaman, Berdikól, Sekseýil eldi mekenderi arqyly ótedi. Joba aıasynda óńirimizdiń eń shetki eldi mekenderiniń de jol qatynasy jaqsarady, - delingen vedomstvonyń resmı habarlamasynda.
Basqarma kelesi jyly oblys ortalyǵynda qandaı jumys atqarylatynyn tizbektep berdi. Aldaǵy jyly Qyzylorda qalasynyń Nazarbaev dańǵylynda Qyzyljarma kanaly arqyly ótetin avtomobıl kópiri (47,7 m) salynyp, Qyzylorda-Qumkól avtojolyndaǵy jol ótkeli (52 metr) qaıta jańǵyrtylady. Maral Ishan – Q. Mahambetov – Táýelsizdikke 25 jyl kóshelerin kire-beris qaqpadan Salamatov kóshesine deıin (6,2 km) qaıta jańǵyrtý, Syrdarııa ózeni arqyly ótetin jaıaý júrginshiler kópiriniń (312 m) qurylysyn bastaý josparlanyp otyr.
– Qazirgi ýaqytta Qyzylorda qalasynyń sol jaǵalaýyna qaraı kólik qozǵalysy Ǵanı Muratbaev kóshesiniń boıyndaǵy kópir arqyly uıymdastyrylǵan. Kúnniń qarbalas ýaqytynda sol jaǵalaýǵa ótý kezinde keptelis paıda bolyp, kóliktiń júrýi qıyndaıdy. Oǵan sebep – oblysymyzda 175 myńǵa jýyq kólik tirkelgen bolsa, onyń 88 myńy Qyzylorda qalasynyń turǵyndaryna tıesili. Osy máseleni sheshý maqsatynda Toqtybaev kóshesinen sol jaǵalaýǵa ótetin kópir qurylysynyń jobalyq-smetalyq qujattary ázirlenip jatyr, - delingen habarlamada.
Aıta keteıik, atalǵan joba keler jyly qolǵa alynady.
Buǵan deıin óńirdegi aýdandar temirjoldyń eki jaǵyna shoǵyrlanyp, kólik qozǵalysy temirjol ótkelderi arqyly uıymdastyrylyp jatqanyn jazǵanbyz.