Qyzylordadaǵy qandaı tarıhı nysandar ıÝNESKO tizimine enýi múmkin
QYZYLORDA. KAZINFORM — Qyzylorda oblysynda 459 tarıhı-mádenı mura nysany memleket qorǵaýyna alynǵan.
Oblystyq mádenıet, arhıvter jáne qujattama basqarmasynyń málimetinshe, onyń 31-i — respýblıkalyq, 398-i — jergilikti mańyzy bar eskertkishter. Al 30 eskertkish aldyn ala esepke alynǵan tarıhı-mádenı mura nysandarynyń qatarynda.
— Jyl saıyn oblystyq bıýdjet esebinen 3 eskertkishke arheologııalyq qazba jumysy keshendi túrde júrgiziledi. Bıyl mundaı jumys ejelgi Bábish mola jáne ortaǵasyrlyq Jankent, Syǵanaq qalashyqtaryn qamtydy. Respýblıkalyq bıýdjet esebinen Quttybaı kesenesinde, Aqtas meshitinde, Syǵanaq, Jankent qalashyqtarynda ǵylymı-restavratsııalyq jumys júrgizildi. Kelesi jyly respýblıkalyq bıýdjet esebinen mundaı is-sharalar Syǵanaq, Jankent qalashyqtarynda, Baqatam kesenesinde atqarylady dep josparlanyp otyr, — dedi basqarma basshysy Janmurat Seıilov.
Sondaı-aq Qyzylorda qalasyndaǵy 7 eskertkishtiń qorǵaý aımaǵynyń jobasy daıyndaldy. Oǵan oblystyq bıýdjetten qarajat bólindi. «Jibek joly: Ferǵana-Syrdarııa dálizi» nomınatsııasy boıynsha oblystaǵy úsh nysan ıÝNESKO-nyń negizgi tizimine enýi múmkin. Olar — Syǵanaq, Jankent qalashyqtary men Jetiasar mádenıeti eskertkishteri.
Aıta keteıik, Memleket basshysynyń Ulttyq quryltaıdyń ІІІ otyrysynda bergen tapsyrmasyna sáıkes Mańǵystaý oblysyndaǵy Ústirt jazyǵyn jáne Mańǵystaýdyń jerasty meshitterin ıÝNESKO-nyń Búkilálemdik muralar tizimine engizý jumysy kezeń-kezeńimen júrgizilip jatyr.