Qyzylordadaǵy eski avtovokzaldy jalǵa alýshylar nege ashýǵa mindi
QYZYLORDA. KAZINFORM — Qyzylorda qalasyndaǵy «Saltanat» avtovokzalyn jalǵa alyp, jumys isteıtin jáne jolaýshy tasymalymen aınalysatyn kásipkerler sońǵy ýaqytta ózderine qarsy qysym kúsheıgenin aıtyp otyr. Olardyń shaǵymyn Kazinform tilshisi tyńdap qaıtty.
Sáýle Ómirzaqova qalanyń Jeńis kóshesi boıynda ornalasqan avtovokzalda onshaqty jyldan beri saýda jasap, nápaqa taýyp júr.
Alaıda sol jaǵalaýda jańa saparjaı qalaı salyndy, sodan beri quzyrly organdar tynym bermeıtin bolǵan.
— Tótenshe jaǵdaılar, sanıtarlyq-epıdemıologııalyq qadaǵalaý salasynyń ókilderi qaıta-qaıta tekseretin boldy. Bizden jańa avtovokzalǵa kóshýdi talap etedi. Alaıda osy jerge úırenip qalǵan biz — kásipkerler de, jolaýshylar da ol jaqqa barǵymyz kelmeıdi. Óıtkeni sol jaǵalaýǵa jetý qıyn, taksıdiń baǵasy ushyp tur, — dedi ol.
Keıipkerimizdiń sózin ózi sııaqty avtovokzaldy jalǵa alyp, bala-shaǵasyn asyrap júrgen Marııa Toǵyzbaeva, Jámıla Taımanova, Asylgúl Músirálıeva, Elmıra Ábenova, Almagúl Aqbergenova syndy kásipkerler de qostady.
Olar eski bolsa da bul nysanda sanıtarlyq normalar men órt qaýipsizdigi talaptarynyń tolyq saqtalǵanyn, al negizsiz tekserýler tek qysym kórsetip, ilik izdeý maqsatynda uıymdastyrylǵanyn jetkizdi.
Al jolaýshy tasymaldaıtyn kólik ıeleri men júrgizýshileri jergilikti polıtsııanyń tekserýinen kóz ashpaı otyr.
Osyny aıtyp quzyrly oryndarǵa hat joldaǵan. Shaǵym ıeleri qalanyń ortalyǵynan tym qashyq saparjaıǵa qatynaý ózderi úshin de, jolaýshylar úshin de tıimsiz dep esepteıdi.
— Mysaly, Qyzylordadan Shıeli aýdanynyń ortalyǵyna jetý quny — 1200 teńge. Al qalanyń negizgi bóliginen sol jaǵalaýǵa taksı 1500 teńgemen aparady. Qyzylordadan Shymkentke deıin bılet — 4000 teńge, qalanyń Shanhaı bóliginen jańa avtovokzalǵa 3500 teńgege taksı jaldaısyz. Bul jolaýshylardyń ashýyn keltiredi, — delingen hatta.
Jolaýshylar kóligi jáne avtomobıl joldary basqarmasy Avtomobıl kóligi týraly zańnyń 14-baby 2-tarmaǵynyń 5-tarmaqshasyna sáıkes avtovokzaldardyń qyzmetti bastaǵany nemese toqtatqany týraly ǵana habarlamalardy qabyldaıtynyn atap ótti.
— Avtomobıl kóligi týraly zańnyń 19-baby 3-tarmaǵynyń 4 jáne 4-1-tarmaqshalaryna sáıkes avtovokzaldar, avtostantsııalar jáne jolaýshylarǵa qyzmet kórsetý pýnkteri qyzmet kórsetý kezinde jolaýshylar men bagajdy avtomobıl kóligimen tasymaldaý qaǵıdalary talaptarynyń oryndalýyn, tasymaldaýshylar kórsetetin qyzmetterdiń, avtovokzaldar, avtostantsııalar jáne jolaýshylarǵa qyzmet kórsetý pýnkteri qyzmetteriniń ulttyq standarttarǵa sáıkestigin tekserý quzyreti ýákiletti organdarǵa júktelgen. Osy oraıda avtomobıl kóligindegi kásipkerlik sýbektilerin tekserý jergilikti atqarýshy organnyń, ıaǵnı basqarmanyń quzyryna jatpaıdy. Basqarma tarapynan oblystaǵy avtovokzaldar, avtostantsııalar jáne jolaýshylarǵa qyzmet kórsetý pýnkteriniń qyzmetine tekserý júrgizilmeıdi, — dedi basqarma basshysy Jánibek Syzdyqov.
Resmı jaýapta byltyr sáýirde qalanyń sol jaǵalaýynda boı kótergen jańa avtovokzal ǵımaratynyń artyqshylyqtary tizilgen.
— Bir ýaqytta 200 jolaýshyny qabyldaı alady, halyqaralyq Batys Eýropa — Batys Qytaı avtojolyna jaqyn, tasymaldaýshylar men jolaýshylar úshin yńǵaıly jerde. Zamanaýı qural-jabdyqtarmen jáne arnaıy qyzmet kórsetý pýnkterimen qamtylǵan. Qazirgi ýaqytta halyqaralyq, oblysaralyq, aýdanaralyq jáne qalaishilik baǵyttar boıynsha 164 avtobýs marshrýty uıymdastyrylǵan. Avtovokzal aımaǵy jol qaýipsizdigi maqsatynda úlken kólemdi avtobýstar qozǵalysyna arnalǵan 4 jolaqty avtomobıl jolymen qamtamasyz etilgen. Jolaýshylardyń qala ishinde júrip-turýyna yńǵaıly bolýy úshin birneshe baǵyttan 49 qalaishilik qoǵamdyq kólik qatynaıdy, — dedi Jánibek Syzdyqov.
Sol jaǵalaýda basqa da áleýmettik nysandar men turǵyn úılerdiń az emestigi keltirilgen. Al ekinshi avtovokzal — «Saltanat» JShS kórsetetin qyzmet túrleri týraly aqparatty kásipkerlik nysanynyń basshylyǵynan alýǵa bolatynyn qaperge salypty.
Biz sóılesken avtovokzaldy jalǵa alýshylar jyly ornymyzdan aıyrylyp qalamyz ba dep qorqady. Al jańa saparjaıǵa kóship barýǵa qarsy.
— Basqa qalalardaǵy sııaqty nege eki, tipti odan da kóp avtovokzal bolmasqa?! — deıdi olar.
Oblystyq kásipkerler palatasy avtovokzal máselesi boıynsha eshqandaı shaǵym túspegenin málimdedi.
Eske salsaq, buǵan deıin biz sol jaǵalaýdaǵy jańa avtovokzal halyqtyń talap-tilegi men suranysyna saı bıýdjet qarjysy esebinen 975 mln teńgege salynǵanyn jazǵanbyz.